Կ. Մանոյան. «Հայաստանը չի համաձայնի որեւէ սկզբունքների, որտեղ ԼՂ-ի կարգավիճակի հարցը ճիշտ ու հստակ ձեւակերպված չէ»
2 րոպեի ընթերցում
ԵՐԵՎԱՆ, 15 ՀՈՒԼԻՍԻ, ԱՐՄԵՆՊՐԵՍ: Հայաստանի իշխանությունները չեն համաձայնի որեւէ սկզբունքների, որտեղ Լեռնային Ղարաբաղի կարգավիճակի հարցը ճիշտ ու հստակ ձեւակերպված չլինի: Նման տեսակետ հայտնեց ՀՅԴ Հայ դատի եւ քաղաքական հարցերի պատասխանատու Կիրո Մանոյանն այսօր լրագրողների հետ հանդիպման ժամանակ: Նրա խոսքով' ղարաբաղյան հարցի կարգավորման գործընթացում դրական արդյունքների հասնելուն խոչընդոտում է Ադրբեջանի որդեգրած կեցվածքը:
«Ադրբեջանի նախագահի հայտարարությունները հաշվի առնելով' լավատեսության հիմք չկա, քանի որ նա շարունակում է պնդել այն, ինչ մինչ այժմ է ասել, այն է' Լեռնային Ղարաբաղի ինքնորոշման իրավունքը կարող է կիրառվել ընդամենն Ադրբեջանի սահմաններում եւ դրանից ավելին իրենց համար անընդունելի է»,-ասաց Կ. Մանոյանը: Նրա կարծիքով' մինչեւ այս կեցվածքը չփոխվի, սկզբունքների շուրջ ինչ-որ համաձայնություն դժվար թե լինի:
Անդրադառնալով այն շրջանառվող լուրերին, ըստ որոնց' բանակցությունների գործընթացում առաջընթաց չարձանագրելու դեպքում հնարավոր է պատերազմ սկսվի' Կ. Մանոյանը նշեց, որ պատերազմի սկսման հավանականությունը մեծ չէ:
ՀՅԴ Հայ դատի եւ քաղաքական հարցերի պատասխանատուի խոսքով' պատերազմի վերսկսումը ոչ միջնորդների, ոչ էլ տարածաշրջանի համար շահեկան չէ, իսկ պատերազմ կարող է սկսել միայն երկու դեպքում' երբ հայ-թուրքական հարաբերությունների կարգավորումը սկսվեր' առանց ադրբեջանական շահերը հաշվի առնելու, եւ երկրորդ' եթե Ադրբեջանը վստահ լինի, որ ինքը կհաղթի:
«Պարզ է, որ ինչքան էլ Ադրբեջանը հոխորտա, պատերազմը շատ ավելի արագ ու անմիջական կսպառնա Ադրբեջանի շահերին, որովհետեւ ի վերջո նավթը խաղաղություն է սիրում, բայց ամեն դեպքում չպետք է բացառել պատերազմը»,-ավելացրեց բանախոսը: