2 րոպեի ընթերցում
ԵՐԵՎԱՆ, 1 ՀՈւԼԻՍԻ, ԱՐՄԵՆՊՐԵՍ: Պետք է կանոնակարգել լրատվական դաշտը, ուղղորդել քարոզչական մոտեցումները. այդ նպատակով կարիք կա ստեղծելու համախմբված կառույց: Այս մասին այսօր լրագրողների հետ հանդիպման ժամանակ նշեց «Նորավանք» գիտակրթական կենտրոնի ղեկավար Գագիկ Հարությունյանը' «Հայկական տեղեկատվական ռեսուրսների համագործակցության խնդիրները տեղեկատվական անվտանգության համատեքստում» թեմայով կլոր սեղան-քննարկման ժամանակ: Մասնակիցները քննարկեցին Հայաստանի լրատվական դաշտի ուժեղ եւ թույլ կողմերը տարածաշրջանային ու միջազգային քարոզչական ուղղություններում' միաժամանակ անդրադառնալով նաեւ ներքին խնդիրներին:
«Հարկավոր է ուշադրության կենտրոնում պահել ոչ միայն տեղի հայկական լրատվամիջոցները, այլեւ Սփյուռքի հայկական մամուլը' փորձելու համար հասկանալ, թե ինչպիսի տեղեկություններ են շրջանառվում Հայաստանի ներքին եւ արտաքին քաղաքականության մասին: Այդ նպատակով հարկավոր է սերտորեն աշխատել նաեւ Սփյուռքի հայկական կառույցների, այդ թվում' նաեւ Հայաստանի դեսպանատների եւ հյուպատոսարանների հետ»,- ասաց քարոզչական պայքարի փորձագետ Վահրամ Միրաքյանը: Նրա խոսքով' ցանկալի կլիներ պետական օժանդակությամբ լրագրողական դասընթացների կազմակերպումը Սփյուռքի հայ լրատվական դաշտի ներկայացուցիչների համար: