1 րոպեի ընթերցում
ԵՐԵՎԱՆ, 27 ՀՈւՆԻՍԻ, ԱՐՄԵՆՊՐԵՍ: Ադրբեջանը չի պատրաստվում Լեռնային Ղարաբաղի խնդրի խաղաղ կարգավորմանը. դա է ցույց տալիս պրակտիկան: Այսօր «Արմենպրես»-ի հետ զրույցում նման տեսակետ հայտնեց Լեռնային Ղարաբաղի Հանրապետության նախագահի աշխատակազմի տեղեկատվության գլխավոր վարչության պետ Դավիթ Բաբայանը' անդրադառնալով Ադրբեջանի նախագահ Իլհամ Ալիեւի' երեկ Բաքվում տեղի ունեցած ռազմական շքերթի ժամանակ ունեցած ելույթին: «Իր ելույթում Ալիեւը հայտարարեց, որ պատերազմը դեռ չի ավարտվել, վերջացել է միայն առաջին փուլը, ինչպես նաեւ' իբր Արցախն ադրբեջանական հող է, եւ իրենք պատրաստվում են հետ վերադարձնել «իրենց» հողերը»,- ասաց Դ.Բաբայանը:
«Այս բոլոր հայտարարությունները ցույց են տալիս այդ պետության հիմնական, բուն էությունը, եւ դրանից մենք միայն մի հետեւություն կարող ենք անել, որ եթե Արցախի անվտանգության համակարգը թուլանա, ապա նրանք անպայման կփորձեն օգտվել այդ հանգամանքից, ուստի մենք պարտավոր ենք դա թույլ չտալ»,- շեշտեց Դ.Բաբայանը: