1 րոպեի ընթերցում
ԵՐԵՎԱՆ, ՀՈՒՆԻՍԻ, ԱՐՄԵՆՊՐԵՍ: Լեռնային Ղարաբաղի հակամարտության բանակցային գործընթացի հաջորդ փուլում Արցախը դառնալու է կարեւորագույն խաղացող եւ որոշող: Այսօր լրագրողների հետ հանդիպման ժամանակ նման տեսակետ հայտնեց քաղաքագետ Սերգեյ Շաքարյանցը' հավելելով, որ պետք է հաշվի առնվեն Արցախի դիտարկումները, առաջարկությունները եւ առարկությունները: Նրա խոսքով' ԵԱՀԿ Մինսկի խմբի համանախագահող երկրների նախագահների դովիլյան հայտարարության մեջ դա ակնարկվում էր:
Ինչ վերաբերում է Կազանում նախատեսված' Հայաստանի, Ռուսաստանի եւ Ադրբեջանի նախագահների հանդիպման սպասելիքներին, քաղաքագետը նշեց, որ հնարավոր է' Ի. Ալիեւին պարտադրվի ստորագրել ռազմական ուժի կիրառումը բացառող հստակ փաստաթուղթ: «Ադրբեջանական կողմը միշտ փորձում է ուժային դիրքերից խոսել Հայաստանի եւ Արցախի հետ»,- ասաց քաղաքագետը' հավելելով, որ դովիլյան հայտարարությունը զգուշացում էր հենց Ադրբեջանին, որ ԼՂ հարցը պետք է լուծվի խաղաղ ճանապարհով:
Ռազմական փորձագետ Արծրուն Հովհաննիսյանը նշեց, ադրբեջանական կողմի ռազմատենչ հայտարարությունները ներքին սպառման համար են արվում: Նրա խոսքով, Ադրբեջանի նախագահը տարբեր հայտարարություններ է անում' կախված նրանից, թե որ երկրի տարածքում է գտնվում: