2 րոպեի ընթերցում
ԵՐԵՎԱՆ, 30 ՄԱՅԻՍԻ, ԱՐՄԵՆՊՐԵՍ: 2011թ-ի գարունը կարելի է որակել որպես թեժ, բայց կառուցողական քաղաքական գարուն: Այսօր լրագրողների հետ հանդիպման ժամանակ նման տեսակետ հայտնեց Ազգային ժողովի ՀՀԿ խմբակցության քարտուղար, կուսակցության մամլո խոսնակ Էդուարդ Շարմազանովը' անդրադառնալով վերջին շրջանում տեղի ունեցող քաղաքական իրադարձություններին:
Խոսելով համաներման մասին' նա ընդգծեց, որ այդ քայլով նախագահ Սարգսյանը ցույց տվեց, որ ինքը հումանիստական արժեքներ կրող, պետականամետ քաղաքական գործիչ է, ով կողմ է երկրի կայուն եւ անցնցում զարգացմանը: «Պատմությունն էլ ցույց է տվել, որ հիմնականում հաջողում են այդ ուղղով ընթացող պետությունները»,- շեշտեց Է.Շարմազանովը' ընդգծելով, որ նախագահն առաջարկում է քաղաքական նոր օրակարգ, որի հիմնական իմաստը կայանում է նրանում, որ անհատի իրավունքները նույնքան կարեւոր են, որքան ազգի հավաքական շահերը:
«Հայաստանում ներկայում տեղի ունեցած բարեփոխումները լայն միջազգային արձագանք են ստացել եւ դրական գնահատականի արժանացել մեր ամերիկացի ու եվրոպացի գործընկերների կողմից»- ասաց ՀՀԿ խոսնակը:
Անդրադառնալով առաջիկա խորհրդարանական ընտրություններին ԲՀԿ-ի առանձին ցուցակով մասնակցելուն' Է.Շարմազանովը շեշտեց, որ դա յուրաքանչյուր քաղաքական ուժի որոշելու հարցն է եւ Հանրապետականը դրան շատ նորմալ է վերաբերվում: