Ըստ Ա. Շահբազյանի` միջազգային հանրությունը շփման գծում կատարված դեպքերի վերաբերյալ գնահատականում երկակի չափանիշերով է առաջնորդվում
2 րոպեի ընթերցում
ԵՐԵՎԱՆ, 13 ՄԱՅԻՍԻ, ԱՐՄԵՆՐՊԵՍ: Միջազգային հանրությունը շփման գծում կատարված իրադարձությունների վերաբերյալ գնահատականում երկակի չափանիշերով է առաջնորդվում: «Արմենպրես»-ի հետ զրույցում նման տեսակետ հայտնեց ՀՀ Ազգային ժողովի ՀՅԴ խմբակցության պատգամավոր Արտյուշա Շահբազյանը' անդրադառնալով Ադրբեջանի դիպուկահարների կողմից սպանված քաղաքացիական անձի դեպքին: Նրա խոսքով' այնիպիսի ավանդույթ է ստեղծվել, որ բոլոր դեպքերում երկու կողմերը մեղավոր են:
«Ակնհայտ է, որ այստեղ կա ադրբեջանական շանտաժը: Սա դատապարտելի է, երբ միջազգային հանրությունը հանդուրժում է այս գործելակերպը: Այստեղ շատ հստակ մոտեցում է անհրաժեշտ: Պետք է բացահայտվեն շփման գծում կատարված դեպքերը եւ պատժվեն մեղավորները: Վերջիվերջո մարդիկ են զոհվում անհասկանալի պայմաններում»,-ասաց Ա. Շահբազյանը: Նա նշեց, որ հայկական կողմը պետք է ոչ միայն շատ կոշտ խոսի, այլեւ կոշտ դիրքորոշում դրսեւորի սահմանի վրա' տալով համարժեք պատասխան:
«Զինադադարը կնքվեց այն ժամանակ, երբ հայկական կողմն Ադրբեջանին ծնկի էր իջեցրել: Հիմա նրանք պարբերաբար խախտում են հրադադարի ռեժիմը, որովհետեւ հղփացել են, մտածում են, որ կարելի է վախեցնել»,-ասաց Ա. Շահբազյանը:
ՀՀ ԱԺ ՀՀԿ խմբակցության ղեկավար Գալուստ Սահակյանի կարծիքով' այստեղ իր դերակատարումն ունի միջազգային հանրությունը:
«Բնականաբար խաղաղ ճանապարհով լուծումների ենք գնում, բայց դա չի նշանակում, որ այդ ճանապարհին համբերությունը մեծ կարող է լինել: Մեր իշխանությունները քաղաքական տարբեր ատյաններում խնդիրը բարձրացնում են: Ադրբեջանը կամաց-կամաց բարբարոսական, առեղծվածային մի միջավայր է իր շուրջը ստեղծել: Միջազգային հանրությունը վերջիվերջո դա չի ներելու»,-ավելացրեց Գ. Սահակյանը: