Հ. Մարգարյան. «Վերահսկիչ պալատի կողմից բացահայտված խախտումների մեղավորները պետք է խստագույնս պատժվեն»
2 րոպեի ընթերցում
ԵՐԵՎԱՆ, 13 ՄԱՅԻՍԻ, ԱՐՄԵՆՊՐԵՍ: Վերահսկիչ պալատի կողմից բացահայտված խախտումների մեղավորները պետք է խստագույնս պատժվեն: Այս մասին այսօր հայտարարեց ՀՀ Ազգային ժողովի ՕԵԿ խմբակցության անդամ Հովհաննես Մարգարյանը խորհրդարանում հրավիրված ճեպազրույցների ժամանակ: Նրա խոսքով' բոլորը պետք է հետեւողական լինեն, որպեսզի գործերն ամբողջությամբ բացահայտվեն:
«Դա անմարդկային քայլ է, ինչպե՞ս կարելի է մտնել աղքատ մարդու գրպանը: Շատ ուրախ եմ, որ գործն արդեն ՀՀ գլխավոր դատախազություն է ուղարկվել: Բոլոր մեղավորները պետք է պատժվեն, նրանք միլիարդավոր դրամներ են մսխել»,-ասաց Հ. Մարգարյանը: Նրա խոսքով' ՀՀ նախագահ Սերժ Սարգսյանը հետեւողական է լինելու եւ հանձնարարական է տվել մինչեւ վերջ հանցագործությունները բացահայտել:
ՀՀ ԱԺ «Հանրապետական» խմբակցության ղեկավար Գալուստ Սահակյանը նշեց, որ երկրում ցանկացած կատարված երեւույթի համար կան կոնկրետ մեղավորներ, սակայն իրենց պատասխանատվության բաժինն ունեն գործող իշխանությունները:
«Իշխանություններն իրենք են բացահայտել այդ խախտումները, գտել են մոդելը, թե ինչպես կկարողանան կոռուպցիայի դեմ պայքարել: Այդ ճանապարհով փորձ է արվում մեղմացնել երկրում կոռուպցիոն իրավիճակը»,-ասաց Գ. Սահակյանը: Նրա խոսքով' համապատասխան քայլեր ձեռնարկվում են, որպեսզի խախտումներն ամբողջությամբ բացահայտվեն եւ մեղավորները պատժվեն: