2 րոպեի ընթերցում
ԵՐԵՎԱՆ, 28 ՀՈւԼԻՍԻ, ԱՐՄԵՆՊՐԵՍ: «PR-ի զարգացման հայկական կենտրոն»-ը Հայաստանում առաջին անգամ այսօր նշեց PR-ի եւ PR մասնագետների միջազգային օրը: Միջոցառմանը մասնակցում էին մի շարք առաջատար ընկերությունների ներկայացուցիչներ, հասարակական-քաղաքական գործիչներ, մտավորականներ, գործարարներ եւ PR-ով հետաքրքրված անձիք: Միջոցառման ընթացքում 15 տարբեր անվանակարգերում մրցանակներ հանձնվեցին դրական հասարակական կարծիքի ձեւավորման գործում ավանդ ունեցող տարբեր անհատների ու կազմակերպությունների:
Մրցանակաբաշխության ժամանակ ցուցադրվեցին բոլոր այն միջոցառումներն ու ակցիաները, որոնք արժանացել են պատվավոր անվանակարգերում մրցանակների: Ինչպես «Արմենպրես»-ի հետ զրույցում նշեց «PR-ի զարգացման հայկական կենտրոն»-ի նախագահ Հայկ Կիրակոսյանը, թեեւ հիմա PR մասնագիտությունը մեծ տարածում չունի Հայաստանում, բայց պետք է հուսալ, որ շուտով այն լայն տարածում կգտնի: «Դրա համար մարդիկ պետք է առաջին հերթին հասկանան, որ իրենց խոսքը եւ ընդհանուր կարծիքը կարող է որոշակի փոփոխություններ մտցնել: Մարդիկ պետք է հավատան, որ հասարակական կարծիքը շատ լուրջ ուժ է»,- ասաց Հայկ Կիրակոսյանը` ավելացնելով, որ PR-ն անձի գովազդ չէ:
Նա նաեւ նշեց, որ մի քանի օր առաջ իրեն զանգահարել են եւ նշել, որ ինքն իրավունք չունի նմանատիպ մրցանակաբաշխություն անցկացնելու: «PR-ի զարգացման հայկական կենտրոն» հանրային կապերի հասարակական կազմակերպությունը հիմնադրվել է 2009 թ-ին եւ նպատակ ունի կայացնել հասարակական կարծիքի ձեւավորման ինստիտուտը Հայաստանում` ի շահ հանրության: Նպաստելով PR-ի զարգացմանը` նրանք պայքարում են հասարակական կարծիքի վրա գործադրվող «բռնությունների» դեմ` թույլ չտալով, որ հասարակական կարծիք ձեւավորման գործիքները վնասեն հանրության հոգեբանական եւ էմոցիոնալ կայունությանը: