2 րոպեի ընթերցում
ԵՐԵՎԱՆ, 1 ՀՈԿՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության արտաքին գործերի նախարար Էդվարդ Նալբանդյանի հրավերով հոկտեմբերի 2-3-ը Հայաստան կայցելի Ռուսաստանի Դաշնության արտաքին գործերի նախարար Սերգեյ Լավրովը: Ինչպես «Արմենպրեսե-ին տեղեկացրին ՀՀ ԱԳՆ մամուլի եւ տեղեկատվության վարչությունից, ացի շրջանակներում կկայանա երկու պետությունների արտաքին քաղաքական գերատեսչությունների ղեկավարների հանդիպումը, որի ավարտից հետո նախատեսվում է համատեղ մամուլի ասուլիս: Ռուսաստանի Դաշնության արտաքին գործերի նախարար Սերգեյ Լավրովին կընդունի Հայաստանի Հանրապետության նախագահ Սերժ Սարգսյանը: Բանակցությունների ընթացքում ծրագրվում է քննարկել Հայաստանի եւ Ռուսաստանի միջեւ դինամիկ զարգացող դաշնակցային փոխհարաբերությունների եւ ռազմավարական գործակցության, այդ թվում արտաքին քաղաքականության համակարգմանը վերաբերող հարցերի լայն շրջանակ: Բարձր մակարդակի երկկողմ քաղաքական երկխոսության շրջանակներում` Հայաստանի եւ Ռուսաստանի արտգործնախարարները հատուկ կանդրադառնան այս տարվա սեպտեմբերին Հայաստանի նախագահ Սերժ Սարգսյանի եւ Ռուսաստանի նախագահ Դմիտրի Մեդվեդեւի` Սոչիում տեղի ունեցած հանդիպման ընթացքում ձեռք բերված պայմանավորվածությունների կատարման ընթացքին: Երեւանում հանդիպումների ժամանակ առանձնակի ուշադրություն կդարձվի արցախյան հիմնախնդրի կարգավորման գործընթացին, ինչպես նաեւ տարածաշրջանում վերջին իրադարձություններին եւ տարածաշրջանային կայունության ու անվտանգության ապահովմանն ուղղված ջանքերին: