Քամ Ղաֆարիանը երազում է տիեզերական քաղաք ստեղծելու և Արեգակնային համակարգից այն կողմ հասնելու մասին. Global High-Tech Award-ի 17-րդ դափնեկիրը Հայաստանում է
3 րոպեի ընթերցում
Global High-Tech Award-ի 17-րդ դափնեկիր Քամ Ղաֆարիանը երազում է տիեզերական քաղաք ստեղծելու և մարդկության համար նոր տիեզերական հնարավորություններ բացահայտելու մասին։
«Տարիներ շարունակ երազել եմ ժամանել Հայաստան և շատ շնորհակալ եմ նաև մրցանակի համար։ Երբ վեց տարեկան էի, ուզում էի հասկանալ, թե ինչ է կատարվում մեր մոլորակից այն կողմ, հասնել Լուսնից և Մարսից էլ հեռու ու հասկանալ ամբողջ տիեզերական համակարգը»,- «Արմենպրես»-ի հաղորդմամբ՝ լրագրողների հետ հանդիպմանն ասաց Ղաֆարիանը։
Նրա խոսքով՝ իր ընկերությունը ստեղծել է առաջին տիեզերական մեքենաներից մեկը, որը հաջողությամբ վայրէջք է կատարել Լուսնի վրա։ Այժմ ընկերությունը պատրաստում է ևս վեց նման մեքենա։
«Մինչ այժմ 12 տիեզերագնաց եմ ուղարկել Լուսին, նրանք այնտեղ մնում են 21 օր և պտույտներ կատարում մոլորակի շուրջ։ Նրանք չեն տեսնում երկրներ ու սահմաններ, այլ միայն տեսնում են այս գեղեցիկ մոլորակը, որտեղ մենք ապրում ենք»,-նշեց նա։
Քամ Ղաֆարիանի պատկերացմամբ՝ մինչև 2050 թվականը տիեզերական կայանը կվերածվի տիեզերական քաղաքի, որտեղ մարդիկ կկարողանան ապրել, աշխատել և զբաղվել արդյունաբերական գործունեությամբ։ Նա նաև կանխատեսել է, որ Լուսնի վրա ամենօրյա վայրէջքները սովորական երևույթ կդառնան։ «Իմ երազանքն է, որ մենք կարողանանք անցնել մեր Արեգակնային համակարգի սահմաններից այն կողմ և կարողանանք վայրէջք կատարել մեր ամենամոտ աստղի վրա»,-հավելեց Ղաֆարիանը։
Գարիկ Իսրայելյան, Քամ Ղաֆարիան, Արմեն Ավետիսյան, Գևորգ Մանթաշյան, Հովիկ Մուսայելյան
Գարիկ Իսրայելյան, Քամ Ղաֆարիան, Արմեն Ավետիսյան
Գարիկ Իսրայելյան
Բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի (Global High-Tech Award) 17-րդ դափնեկիր Քամ Ղաֆարիանի պաշտոնական այցի մեկնարկին նվիրված մամուլի ասուլիսը
Գևորգ Մանթաշյան
Գարիկ Իսրայելյան, Քամ Ղաֆարիան, Արմեն Ավետիսյան, Գևորգ Մանթաշյան, Հովիկ Մուսայելյան
Քամ Ղաֆարիան
Քամ Ղաֆարիան, Արմեն Ավետիսյան
Արմեն Ավետիսյան
Գարիկ Իսրայելյան, Քամ Ղաֆարիան, Արմեն Ավետիսյան
Հովիկ Մուսայելյան
Քամ Ղաֆարիանը (Kam Ghaffarian) Բարձր տեխնոլոգիաների ոլորտում համաշխարհային ներդրման համար ՀՀ պետական մրցանակի (Global High-Tech Award) 17-րդ դափնեկիրն է։ Նա ամերիկացի ճարտարագետ և միլիարդատեր ձեռնարկատեր է, ով հայտնի է տիեզերական և էներգետիկ ոլորտներում իր հեղափոխական նախագծերով։
Նա հանդիսանում է տիեզերական և խորը տեխնոլոգիաների ոլորտի 5 խոշորագույն ընկերությունների համահիմնադիրն ու ղեկավարը՝ Axiom Space (ստեղծում է առաջին առևտրային տիեզերական կայանը), Intuitive Machines (2024 թվականին նրա կառուցած Odysseus սարքը պատմական վայրէջք կատարեց Լուսնի վրա), X-energy (զարգացնում է նոր սերնդի միջուկային ռեակտորներ), ինչպես նաև IBX և Quantum Space։