1 րոպեի ընթերցում
Telegram սոցիալական հարթակում ՀՀ մարդու իրավունքների պաշտպան Անահիտ Մանասյանի անունով և լուսանկարով կեղծ օգտահաշիվ է բացվել, որից քաղաքացիներին հաղորդագրություններ են ուղարկվում։
«Արմենպրես»-ի փոխանցմամբ՝ այս մասին հայտնում են ՄԻՊ աշխատակազմից, ընդգծելով, որ վերոնշյալ՝ @Dokto111 օգտահաշիվը որևէ առնչություն չունի Անահիտ Մանասյանի կամ ՄԻՊ աշխատակազմի հետ։
«Խնդրում ենք չպատասխանել հաղորդագրություններին, չտրամադրել անձնական տվյալներ և բողոքարկել ու արգելափակել կեղծ օգտահաշիվը»,– հորդորում են կառույցից։
Ավելի վաղ ՀՀ ԱԺ նախագահ Ռուբեն Ռուբինյանը, ԿԳՄՍ նախարար Ժաննա Անդրեասյանը, ՇՄ նախարար Համբարձում Մաթևոսյանը, Էկոնոմիկայի նախարար Գևորգ Պապոյանը և Երևանի քաղաքապետ Տիգրան Ավինյանը ևս զգուշացրել էին սոցիալական հարթակներում իրենց անուններով և նկարներով բացված կեղծ օգտահաշիվների մասին։
Հայաստանի կենտրոնական բանկը նույնպես զգուշացրել էր կառույցի անունից կեղծ լիազորագրերի, տեղեկանքների և այլ փաստաթղթերի տարածման դեպքերի մասին։