1 րոպեի ընթերցում
Մոտավորապես 200 մարդ փակել է երթևեկությունը Մադրիդի մայրուղու հատվածներից մեկում ուսուցիչների անժամկետ գործադուլի շրջանակներում։ «Արմենպրես»-ի փոխանցմամբ՝ այս մասին հաղորդել է El País թերթը։
Պարբերականի տեղեկատվության համաձայն՝ ակցիան սկսվել է տեղական ժամանակով մոտավորապես 08:30-ին։ Ակցիայի մասնակիցները դպրոցական նստարաններ և աթոռներ են դրել ճանապարհի մեջտեղում։ Ի թիվս այլ բաների, հավաքվածները վանկարկել են՝ «Պետական կրթությունը չի վաճառվում, պետական կրթությունը պաշտպանում են»։ Հարյուրավոր վարորդներ ճանապարհի այդ հատվածում հայտնվել են արգելափակման մեջ։
Մադրիդի ինքնավար համայնքի պետական ուսումնական հաստատությունների մանկավարժական կազմի անժամկետ գործադուլը սկսվել է հոկտեմբերի 14-ին։ Գործադուլի մասնակիցները պահանջում են, այդ թվում, ավելացնել կրթության ֆինանսավորումը, նվազեցնել աշակերտների թիվը դասարաններում և բարելավել ուսուցիչների աշխատանքային պայմանները։ Ավելի վաղ տարածաշրջանում արդեն կազմակերպվել էին տարբեր պիկետներ, ցույցեր ու հանրահավաքներ։