Արևելագիտության ինստիտուտում անցկացվել է «Հայկական լեռնաշխարհի և Փոքր Ասիայի մշակութային առնչությունները մ.թ.ա. II–I հազարամյակներում» խորագրով գիտաժողով
3 րոպեի ընթերցում
Արևելագիտության ինստիտուտում անցկացվել է «Հայկական լեռնաշխարհի և Փոքր Ասիայի մշակութային առնչությունները մ.թ.ա. II–I հազարամյակներում» խորագրով միջազգային գիտաժողովը, որը կազմակերպվել է ՀՀ ԿԳՄՍՆ Բարձրագույն կրթության և գիտության կոմիտեի ֆինանսավորմամբ՝ «Գիտական արդյունավետության խթանման դրամաշնորհային ծրագիր-2025» օտարերկրյա գործընկերոջ պարտադիր ներգրավմամբ, «25RG-6A052» ծածկագրով դրամաշնորհի շրջանակներում։
«Արմենպրես»-ի փոխանցմամբ՝ ինստիտուտի տարածած հաղորդագրության մեջ նշվում է, որ գիտաժողովը միավորել է տարբեր երկրների ու ոլորտների հետազոտողների, որոնք անդրադարձել են Հայկական լեռնաշխարհի և Փոքր Ասիայի հնագույն պատմության, լեզուների, նյութական և հոգևոր մշակույթի, ինչպես նաև տարածաշրջանի ժողովուրդների փոխառնչությունների հիմնահարցերին։
Գիտաժողովի գիտական շրջանակն ընդգրկել է հնագիտության, պատմության, լեզվաբանության և արվեստի պատմության խնդիրներ։ Զեկուցումներում ներկայացվել են հնագույն գրավոր աղբյուրների, պատկերագրական հուշարձանների և մշակութային ժառանգության ուսումնասիրության տարբեր մոտեցումներ՝ հնարավորություն ընձեռելով Հայկական լեռնաշխարհի պատմամշակութային զարգացումները դիտարկելու Առաջավոր Ասիայի ավելի լայն համատեքստում։
Գիտաժողովի միջազգային բնույթն ընդգծվել է ծրագրում ընդգրկված՝ Գերմանիայի, Նիդեռլանդների, Վրաստանի գիտական շրջանակների ներկայացուցիչների մասնակցությամբ։
«Տարբեր հետազոտական մոտեցումների համադրումը նպաստում է Հայկական լեռնաշխարհի ու Փոքր Ասիայի պատմամշակութային առնչությունների առավել ամբողջական ուսումնասիրությանը։
Գիտաժողովը կարևոր հարթակ է հնագույն քաղաքակրթությունների փոխազդեցությունների, մշակութային ժառանգության և տարածաշրջանային պատմության հիմնահարցերի շուրջ գիտական երկխոսության զարգացման համար։ Այն հնարավորություն է ընձեռում տարբեր ոլորտների մասնագետներին համադրելու գրավոր, հնագիտական և պատկերագրական աղբյուրները՝ նորովի գնահատելու Հայկական լեռնաշխարհի տեղն ու դերը Առաջավոր Ասիայի հնագույն պատմության մեջ»,– նշված է Արևելագիտության ինստիտուտի տարածած հաղորդագրության մեջ։