1 րոպեի ընթերցում
Պակիստանի անվտանգության ուժերը 19 գրոհայինի են ոչնչացրել Բելուջիստանի նահանգում։ Ինչպես «Արմենպրես»-ը տեղեկանում է ՏԱՍՍ գործակալությունից, այդ մասին հայտնել է Իսլամական Հանրապետության զինված ուժերի՝ հասարակայնության հետ կապերի միջգերատեսական վարչությունը (ISPR)։
«Ֆիթնա ալ Խավարիջ» և «Ֆիթնա ալ Հինդուստան» խմբավորումների դեմ հակաահաբեկչական գործողություններ են իրականացվել Քվետայի և Քեչի շրջաններում։ Զինյալների հետ բախումների ընթացքում զոհվել է մեկ պակիստանցի զինծառայող։
Պակիստանի և Հնդկաստանի հարաբերություններում լարվածության սրման ֆոնին պակիստանյան իշխանությունները սկսել են երկրում գործող ահաբեկչական կազմակերպությունների մեծ մասը պաշտոնապես դիտարկել որպես Հնդկաստանի գործակալներ և դրանց տվել են «Ֆիթնա ալ Հինդուստան» ընդհանուր անվանումը։
Ըստ ISPR-ի տվյալների՝ 2025 թվականին Պակիստանի անվտանգության ուժերը ոչնչացրել են 2 597 զինյալի։ Այդ ժամանակահատվածում Պակիստանում գրանցվել է 5 397 ահաբեկչական հարձակում, որոնց հետևանքով զոհվել է 1 235 մարդ։