Իրանական ավիաընկերությունների միջազգային չվերթերը կշարունակվեն ըստ ժամանակացույցի․ Իրանի քաղավիացիա

Իրանական ավիաընկերությունների միջազգային չվերթերը սեպտեմբերի վերջից կշարունակվեն ըստ ժամանակացույցի։ Ինչպես «Արմենպրես»-ը տեղեկանում է  ISNA գործակալությունից, այս մասին հայտնել է Իրանի քաղաքացիական ավիացիայի խոսնակ Մաջիդ Ախավանը։

«Մինչ օրս իրանական ավիափոխադրողների կողմից իրականացվող միջազգային չվերթերից ոչ մեկը չի չեղարկվել, և գործողություններն ընթանում են ըստ նախատեսվածի», - ասել է Ախավանը՝ հավելելով, որ ժամանակացույցի ցանկացած փոփոխության մասին ուղևորներին կտեղեկացվի նախապես։

Խոսնակը նշել է, որ վերջին սահմանափակումների լույսի ներքո ավիացիոն իշխանությունները խորհրդակցություններ են անցկացնում և ծրագրեր մշակում՝ ապահովելու թռիչքների անխափան շարունակականությունը։

Միևնույն ժամանակ, ազգային Iran Air (Homa) ընկերությունը հայտարարություն է տարածել, որում հաստատում է, որ չի ստացել որևէ պաշտոնական ծանուցում կամ հրահանգ Թուրքիայի, Ադրբեջանի կամ Իրաքի քաղաքացիական ավիացիայի իշխանություններից դեպի Ստամբուլ, Բաքու կամ Նաջաֆ չվերթերի դադարեցման վերաբերյալ։

Iran Air-ն ընդգծել է, որ այս երթուղիներով իր թռիչքների ժամանակացույցը մնում է ուժի մեջ։ Ընկերությունը խորհուրդ է տվել ուղևորներին հետևել ավիաընկերության պաշտոնական հաղորդակցման ալիքներին՝ իրենց ճանապարհորդության կարգավիճակի վերաբերյալ թարմացումներ ստանալու համար։

Ավելի վաղ ԱՄՆ ֆինանսների նախարար Սքոթ Բեսենթը հայտարարել էր, որ սեպտեմբերի 23-ից իրանական բոլոր ավիաընկերությունների աշխատանքը կարգելափակվի: Վաշինգտոնը սպառնում է արտասահմանյան ընկերությունների նկատմամբ լրացուցիչ պատժամիջոցներ կիրառել, եթե նրանք շարունակեն սպասարկել Իրանի ավիափոխադրողներին։

Չինաստանը դեմ է արտահայտվել միակողմանի պատժամիջոցների կիրառմանը։