ՀՀ Անկախության հռչակման տոնակատարությունների շրջանակում Գյումրիում առաջին անգամ կանցկացվի «Tricolor» Gyumri Run-ը

Հայաստանի Հանրապետության անկախության հռչակման տոնակատարությունների շրջանակում առաջին անգամ Գյումրիում կանցկացվի միջոցառումների շարք, որը կմիավորի առողջ ապրելակերպը, սպորտը, ազգային մշակույթը, ժամանակակից երաժշտությունն ու քաղաքային ժամանցը։

«Արմենպրես»-ի փոխանցմամբ՝ Հայ օգնության ֆոնդի Հայաստանի մասնաճյուղից տեղեկացրին, որ ծրագրի մեկնարկը կտրվի «Tricolor» Gyumri Run-ով՝ սեպտեմբերի 20-ին ժամը 12:00-ին Գյումրիի Վարդանանց հրապարակից։

Կազմակերպիչների փոխանցմամբ՝ միջոցառումը միայն վազքի մրցույթ չէ, այլ քաղաքային մեծ տոն։ Մասնակիցները հնարավորություն կունենան ընտրելու 1, 2, 5 կամ 10 կմ երկարությամբ վազքուղիներ։ Վազքին կմասնակցեն ինչպես պրոֆեսիոնալ վազորդներ, այնպես էլ սկսնակներ, ընտանիքներ և առողջ ապրելակերպի կողմնակիցներ։ Վազքուղին անցնելու է Գյումրու պատմական կենտրոնի փողոցներով։

Կազմակերպիչների գնահատմամբ՝ սա Գյումրիում երբևէ անցկացված ամենախոշոր վազքարշավն է։

««Tricolor» Gyumri Run-ի նպատակն է խթանել զանգվածային սպորտի զարգացումն ու առողջ ապրելակերպը, արժևորել և հանրահռչակել ՀՀ պետական տոներն ու խորհրդանշանները, ինչպես նաև զարգացնել մարզային զբոսաշրջությունը՝ մասնակիցներին ծանոթացնելով Գյումրու պատմամշակութային ժառանգությանը։ Միջոցառման շրջանակում նախատեսվում են նաև մշակութային և ժամանցային ծրագրեր։ Նախաձեռնությանը միացել են Գյումրու թանգարանները, պատկերասրահներն ու ժամանցի վայրերը, որոնք միջոցառման մասնակիցներին հնարավորություն կտան ծանոթանալու քաղաքի մշակութային կյանքին»,-նշված է հաղորդագրության մեջ։

Վազքարշավը կունենա նաև սոցիալական և բարեգործական բաղադրիչ։ Հայ օգնության ֆոնդի «Ayo!» հարթակի աջակցությամբ հավաքագրված միջոցների մի մասն ուղղվելու է Գյումրիում հաշմանդամություն ունեցող երեխաների համար անվճար ֆիզիոթերապիայի կազմակերպմանը։ Կազմակերպիչների խոսքով՝ նախաձեռնությունը նպատակ ունի սպորտային միջոցառումը վերածել քաղաքային տոնի՝ միաժամանակ նպաստելով Գյումրիի մշակութային ժառանգության հանրահռչակմանը, զբոսաշրջության զարգացմանն ու սոցիալական ծրագրերի իրականացմանը։