Իսրայելի վարչապետն ու պաշտպանության նախարարն այցելել են Լիբանանի անվտանգության գոտի

Իսրայելի վարչապետ Բենիամին Նեթանյահուն պաշտպանության նախարար Իսրայել Կացի և Իսրայելի պաշտպանության ուժերի գլխավոր շտաբի բարձրաստիճան պաշտոնյաների հետ միասին այցելել է հարավային Լիբանանի անվտանգության գոտի։ Այդ մասին տեղեկացնում է «Արմենպրես»-ը՝ վկայակոչելով «ՌԻԱ Նովոստի»-ն։

Իսրայելի վարչապետը և պաշտպանության նախարարը բանակի հյուսիսային կորպուսի հրամանատարից և տեղում գտնվող բրիգադի հրամանատարներից մանրամասն ծանոթացել են այդ հատվածում տիրող իրավիճակին։

Նեթանյահուն զինվորականների հետ զրույցում ընդգծել է անվտանգության գոտու պահպանման և «Հըզբոլլահի» ենթակառուցվածքների շարունակական ոչնչացման կարևորությունը։ Նա նաև հրահանգել է զորքերին անհապաղ արձագանքել իրենց անվտանգությանը սպառնացող ցանկացած սպառնալիքի։

«Քանի դեռ «Հըզբոլլահը» այստեղ ներկա է և սպառնում է մեզ, մենք կմնանք։ Մեր հրահանգը զորքերին հետևյալն է. եթե սպառնալիք տեսնեք, գործեք», - հայտարարել է Նեթանյահուն։