2 րոպեի ընթերցում
ԱՄՆ կառավարությունն անողոք պատերազմ է վարում Կուբայի դեմ, որի նպատակն է երկիրը զրկել ժողովրդի հիմնական կարիքները բավարարելու հնարավորությունից: «Արմենպրես»-ի փոխանցմամբ՝ այս մասին հայտարարել է կարիբյան հանրապետության նախագահ Միգել Դիաս-Կանելը:
«ԱՄՆ-ի ագրեսիան Կուբայի դեմ անընդհատ է և սաստկանում է նրանց անկարողության պատճառով՝ մեզ տեսնել պարտված։ Յուրաքանչյուր գործողություն և յուրաքանչյուր միջոց ուղղված է նրան, որ երկիրը զրկվի ժողովրդի հիմնական կարիքները բավարարելու հնարավորությունից․ հարձակումներ են իրականացվում եկամուտների աղբյուրների վրա, ֆինանսական ուղիների, վառելիքի մատակարարումների և տեխնոլոգիաների փոխանցման հասանելիության վրա», - գրել է Կուբայի ղեկավարը X հարթակում:
Նրա խոսքով՝ Միացյալ Նահանգների կառավարությունը համոզված է, որ ոչ մի երկիր չի կարող գործել և գոյատևել նման անողոք պատերազմի պայմաններում։ Դիաս-Կանելը խոստովանել է, որ տնտեսական ճնշումը «կոնկրետ և դաժան ազդեցություն» է գործում, սակայն ընդգծել է, որ Վաշինգտոնին «ապշեցնում է» այդ պայմաններում կուբացի ժողովրդի «դիմադրելու և ստեղծելու ունակությունը»:
ԱՄՆ-ն պատժամիջոցներ է սահմանել Կուբայի նկատմամբ, որոնք թիրախավորում են նավթի մատակարարումները երկիր։ Նախագահ Դոնալդ Թրամփը նաև արտակարգ դրություն է հայտարարել՝ ԱՄՆ ազգային անվտանգությանը Կուբայի կողմից ենթադրյալ սպառնալիքի պատճառով: Այս միջոցառումը սրել է կղզու վառելիքի պակասը՝ ազդելով էլեկտրաէներգիայի արտադրության, տրանսպորտի, սննդի արտադրության, առողջապահության և այլ ոլորտների վրա: