1 րոպեի ընթերցում
Ամերիկացի զինվորականները հերթական հարվածն են հասցրել նավին, որը, ենթադրաբար, թմրանյութեր էր փոխադրում Կարիբյան ծովում: «Արմենպրես»-ի փոխանցմամբ՝ այս մասին հայտնել է ԱՄՆ զինված ուժերի Հարավային հրամանատարությունը։
«Հետախուզությունը հաստատել է, որ նավն ընթանում էր Կարիբյան ծովում թմրամիջոցների մաքսանենգության հայտնի երթուղիներով և օգտագործվում էր թմրանյութերի ապօրինի շրջանառության համար», - ասվում է X-ում հրամանատարության հրապարակման մեջ։
Հարվածի հետևանքով երկու մարդ զոհվել է, վեցը ողջ է մնացել։
«Հարավային հրամանատարությունն անմիջապես այդ մասին տեղեկացրել է ԱՄՆ Առափնյա պահպանության ծառայությանը, որպեսզի ողջ մնացածների համար ակտիվացվի որոնողական-փրկարարական համակարգը», - նշվում է հաղորդագրության մեջ։
Ամերիկյան զանգվածային լրատվամիջոցների տվյալներով՝ 2025 թվականի աշնանը թմրանյութերի մաքսանենգության դեմ պայքարի նպատակով ենթադրաբար թմրավաճառների կողմից օգտագործվող նավակներին ամերիկյան հարվածներից զոհվել է ավելի քան 200 մարդ: