1 րոպեի ընթերցում
Ազգային ժողովի նախագահ Ալեն Սիմոնյանը հայտնել է, որ օրենսդրական նախաձեռնությամբ նախատեսվում է խստացնել ընտրակաշառք տալու և վերցնելու համար սահմանված պատիժները։ «Արմենպրես»-ի հաղորդմամբ՝ Սիմոնյանն այս մասին նշել է հրապարակած տեսանյութում՝ տեղեկացնելով, որ հարցը կքննարկվի և կքվեարկվի Ազգային ժողովի արտահերթ նիստում։
Նրա խոսքով՝ փոփոխությունը վերաբերում է ընտրակաշառք տալու և վերցնելու համար նախատեսված պատժաչափերին։
«Խոսքը վերաբերում է ընտրակաշառք տալուն և վերցնելուն։ Դրանց պատիժը կխստացվի»,-նշել է Սիմոնյանը։
ԱԺ նախագահի ներկայացմամբ՝ ընտրակաշառք վերցնելու համար նախկինում նախատեսված մինչև 7 տարվա ազատազրկման փոխարեն կսահմանվի մինչև 9 տարվա ազատազրկում։ Ընտրակաշառք տալու համար նախատեսված պատիժը ևս կխստացվի՝ մինչև 8 տարվա փոխարեն սահմանվելով մինչև 10 տարվա ազատազրկում։
«Բնական է, սա միակ գործիքը չէ, որը կիրառվելու է ընտրակաշառք տվողների և վերցնողների դեմ։ Կլինեն այլ գործիքներ, նաև քաղաքական հետևանքներ կլինեն»,-ասել է ԱԺ նախագահը։