Եվս մեկ ընտրատեղամասի քվեարկության արդյունքներն անվավեր են ճանաչվել

Կենտրոնական ընտրական հանձնաժողովը հաղորդագրություն է տարածել՝ հայտնելով ևս մեկ ընտրատեղամասում քվեարկության արդյունքներն անվավեր ճանաչելու մասին։

«Թիվ 12 Ընտրատարածքային ընտրական հանձնաժողովն անվավեր է ճանաչել իր սպասարկման տարածքում գտնվող 12/13 ընտրական տեղամասի քվեարկության արդյունքները։ Այս տեղամասում քվեարկության  օրը բացակայել է 8 համարի քվեաթերթիկը։ Թիվ 12/13 տեղամասի քվեարկության մասնակիցների թիվը՝ 809, որոշման համաձայն արձանագրվել է որպես անճշտությունների գումարային չափ։

Ընտրական տեղամասի արձանագրության մյուս արդյունքները, բացառությամբ անճշտությունների չափի, ըստ որոշման արձանագրվել են զրո։ Ընտրական տեղամասի նյութերն ուղարկվել են դատախազություն»,- «Արմենպրես»-ի փոխանցմամբ՝ ասված է հաղորդագրության մեջ։

Հիշեցնենք, որ նշված ընտրական տեղամասում քվեարկության արդյունքներն անվավեր ճանաչելու դիմումը ԿԸՀ ներկայացրել էր «Ուժեղ Հայաստան» դաշինքը։ Այդ ընտրատեղամասում չի եղել «Ազգային ժողովրդավարական բևեռ» կուսակցության քվեաթերթիկը։

ԿԸՀ-ն «Անկախ դիտորդ» դաշինքի  ներկայացուցիչ Դանիել Իոաննիսյանի դիմումի հիման վրա հունիսի 11-ին անվավեր էր ճանաչել նաև թիվ 10/51 և թիվ 35/65 ընտրական տեղամասերում քվեարկության արդյունքները։ Իոաննիսյանն այդ հարցով ԿԸՀ էր դիմել ընդդիմադիրների բողոքների, ինչպես նաև այդ տեղամասի գրանցամատյաններում արված գրառումների հիման վրա, որ «այդ տեղամասերում քվեարկության համար չնախատեսված ժամին զինծառայողների ուղղորդված քվեարկություն է եղել»։