Կառավարությունն աջակցում է կաթի արտադրությամբ զբաղվող տնտեսավարողներին

Կառավարությունն աջակցում է հանրապետության բոլոր մարզերում կաթի արտադրությամբ զբաղվող տնտեսավարողներին:

«Արմենպրես»-ի հաղորդմամբ՝ այս մասին հայտնել են ՀՀ էկոնոմիկայի նախարարությունից՝ նշելով, որ ծրագրի շահառու կարող են լինել 2026 թվականի ապրիլի 1-ի դրությամբ կովի անմշակ կաթի արտադրություն իրականացնող այն տնտեսավարողները, որոնց կենդանիները հաշվառված են «ԱՆԻ ՊԱՍ» էլեկտրոնային համակարգում և մասնակցել են պետական պատվաստման ու ախտորոշիչ միջոցառումներին։

Սուբսիդավորումը տրամադրվում է շահառուի կողմից տնօրինվող միայն 3-րդ գլխից սկսած մինչև 22 գլուխը ներառյալ կովերի համար (առավելագույնը 20 գլուխ) ՝ մեկ կովի հաշվով 15000 դրամի չափով։

Սուբսիդավորում ստանալու համար անհրաժեշտ է էլեկտրոնային կամ թղթային եղանակով դիմում ներկայացնել համայնքի կամ բնակավայրի վարչական ղեկավարին՝ նշելով բնակության վայրն ու հասցեն, հեռախոսահամարը, բանկային հաշվեհամարը, տնօրինվող կովերի գլխաքանակը և դրանց ականջապիտակների համարները։

Դիմումին կից անհրաժեշտ է ներկայացնել՝ անձը հաստատող փաստաթղթի պատճենը, «Գյուղատնտեսական ծառայությունների կենտրոն» ՊՈԱԿ-ի անասնաբույժի կողմից տրված գրանցամատյանից քաղվածք՝ կենդանիների՝ պատվաստման ծրագրում ընդգրկված լինելու վերաբերյալ։

Ծրագրին մասնակցելու համար արդեն իսկ ընդունվել է 690 դիմում-հայտ՝ շուրջ 4373 գլուխ կենդանու համար։

Դիմում-հայտերի ընդունման գործընթացը շարունակվում է: