Ռոբերտ Քոչարյանն ընտրություններում հաջողության հասնելու դեպքում խոստանում է շարունակել 16 միլիոնի պետական աջակցության ծրագիրը

«Հայաստան» դաշինքի ընտրական ցուցակի առաջին համար Ռոբերտ Քոչարյանը վստահեցրել է, որ խորհրդարանական ընտրություններում հաջողության հասնելու և իշխանություն ձևավորելու դեպքում իր ուժը պատրաստվում է շարունակել սահմանամերձ և առանձին բնակավայրերում տուն կառուցելու համար 16 միլիոնի չափով պետական աջակցության ծրագիրը։

«Արմենպրես»-ի հաղորդմամբ՝ այս մասին Ռոբերտ Քոչարյանը ասել է հունիսի 7-ին Հայաստանում կայանալիք խորհրդարանական ընտրությունների նախընտրական քարոզարշավի շրջանակներում Տավուշի մարզի Նոյեմբերյան քաղաքում բնակիչների հետ ունեցած հանդիպման ժամանակ։ 

Պատասխանելով հարցին, թե «Հայաստան» դաշինքը խորհրդարանական ընտրություններում հաջողության հասնելու և իշխանություն ունենալու դեպքում շարունակելո՞ւ է արդյոք սահմանամերձ և առանձին բնակավայրերում տուն կառուցելու համար 16 միլիոնի չափով պետական աջակցության ծրագիրը՝ Քոչարյանը դրական արձագանք է տվել։

«Այդ ծրագիրն անպայման շարունակվելու է։ Այն, ինչ շինարարության առումով կատարվում է Երևանում, լավ տեղ չի տանելու, քանի որ այդ մասնավոր հատվածը կենտրոնացել է Երևանում, և այդ տեմպերով շինարարությունը, կարծես, դատարկում է շրջանները։ Պետության գործառույթը պետք է լինի տարածքների համաչափ զարգացումը»,-նշել է Քոչարյանը։

Նա նաև հավելել է, որ պետական աջակցության շրջանակներում տրամադրվող այդ 16 միլիոնի ծրագիրը նույնիսկ համաչափ չի այն ամենի հետ, ինչ կատարվում է Երևանում։

Նա նաև ընդգծել է, որ իր ղեկավարման դեպքում վերականգնվելու է գյուղատնտեսության նախարարությունը՝ բնակիչներին վստահեցնելով նաև, որ այդ ոլորտը լինելու է իր իշխանության առաջնահերթություններից մեկը։

ՀՀ աշխատանքի և սոցիալական հարցերի նախարարությունը մայիսի 23-ին տեսանյութ էր հրապարակել՝ հայտնելով, որ սահմանամերձ և առանձին բնակավայրերում տուն կառուցելու համար պետական աջակցության ծրագրից արդեն իսկ օգտվել է 2973 ընտանիք։

Մայիսի 8-ից մեկնարկել է Հայաստանում հունիսի 7-ին կայանալիք խորհրդարանական ընտրությունների նախընտրական քարոզարշավը, որը կշարունակվի մինչև հունիսի 5-ը։ Ընտրապայքարին մասնակցում է 18 քաղաքական ուժ՝ 2 դաշինք և 16 կուսակցություն։ «Հայաստան» դաշինքը խորհրդարանական ընտրություններին մասնակցում է 17 համարի ներքո՝ «Միասին կարող ենք» կարգախոսով։ Դաշինքի կազմում միավորված են Հայ Հեղափոխական Դաշնակցություն և «ԱռԱջ» կուսակցությունները։ Դաշինքը ԿԸՀ է ներկայացրել 213 թեկնածուից բաղկացած ցուցակ և ազգային փոքրամասնությունների 4 թեկնածուից բաղկացած ցուցակ։