1 րոպեի ընթերցում
«Զանգը» հռչակավոր ճապոնական սարսափ վեպի հեղինակ Կոջի Սուզուկին մահացել է 68 տարեկան հասակում։ «Արմենպրես»-ի հաղորդմամբ` այս մասին հայտնում է Kyodo-ն։
Գործակալությունը հաղորդում է, որ գրողը մահացել է մայիսի 8-ին Տոկիոյի հիվանդանոցում։ Այլ մանրամասներ չեն հայտնվում։
Սուզուկիի դեբյուտային վեպը՝ «Դրախտը», 1990 թվականին արժանացել է Ճապոնիայի ֆենթեզի վեպերի մրցանակաբաշխության գլխավոր մրցանակին։
Սուզուկին միջազգային ճանաչում է ստացել 1991 թվականին հրատարակված «Զանգը» վեպի շնորհիվ։ Հիդեո Նակատայի 1998 թվականի կինոադապտացիայից հետո վեպը դարձել է համաշխարհային մշակութային ֆենոմեն` սկիզբ դնելով մեդիա ֆրանշիզի, այդ թվում՝ Գոռ Վերբինսկու 2002 թվականի հոլիվուդյան ռիմեյքի ու բազմաթիվ միջազգային ադապտացիաների։
Նրա աշխատանքները գովասանքի են արժանացել ինչպես Ճապոնիայում, այնպես էլ արտերկրում։ «Պարույր» վեպը արժանացել է Էյջի Յոշիկավայի գրական մրցանակին, իսկ «Եզր» վեպը՝ Շիրլի Ջեքսոնի մրցանակին ԱՄՆ-ում։