Պուտինը շնորհավորել է նախկին ԽՍՀՄ-ի հանրապետությունների ղեկավարներին ու ժողովուրդներին Հաղթանակի օրվա առթիվ
2 րոպեի ընթերցում
ՌԴ նախագահ Վլադիմիր Պուտինը շնորհավորանքներ է հղել նախկին ԽՍՀՄ հանրապետությունների, միջազգայնորեն չճանաչված Աբխազիայի և Հարավային Օսիայի ղեկավարներին, ինչպես նաև Վրաստանի ու Մոլդովայի ժողովուրդներին՝ Հայրենական մեծ պատերազմում տարած հաղթանակի տարեդարձի կապակցությամբ։
«Արմենպրես»-ի փոխանցմամբ՝ այս մասին հաղորդագրություն է տարածել Կրեմլի մամուլի ծառայությունը:
«Հայրենական մեծ պատերազմում տարած հաղթանակի 81-րդ տարեդարձի կապակցությամբ Վլադիմիր Պուտինը շնորհավորական ուղերձներ է հղել Ադրբեջանի, Հայաստանի, Բելառուսի, Ղազախստանի, Ղրղզստանի, Տաջիկստանի, Թուրքմենստանի, Ուզբեկստանի, Աբխազիայի, Հարավային Օսիայի ղեկավարներին, ինչպես նաև Վրաստանի ու Մոլդովայի ժողովուրդներին», - ասվում է Կրեմլի կայքում մայիսի 8-ին հրապարակված հաղորդագրության մեջ։
Պուտինն ընդգծել է, որ այդ օրը «մենք մեր երախտագիտությունն ու հարգանքն ենք հայտնում մեր հայրերին ու պապերին, որոնք ուս-ուսի տված կռվել են ռազմաճակատում և աշխատել թիկունքում՝ անհամար զոհերի և զրկանքների գնով մոտենալով նացիստական զավթիչների նկատմամբ երկար սպասված Հաղթանակին»։
Նա նաև սրտանց շնորհավորանքներ ու անկեղծ երախտագիտության խոսքեր է հայտնել Հայրենական մեծ պատերազմի վետերաններին և թիկունքի աշխատավորներին՝ մաղթելով նրանց քաջառողջություն, ոգու ամրություն և երկարակեցություն։
«Վրաստանի ու Մոլդովայի ժողովուրդներին հղած իր ուղերձներում Պուտինը կոչ է արել պահպանել պատերազմական դաժան տարիների իրադարձությունների մասին հիշողությունը, ապագա սերունդներին փոխանցել մեր երկրների ժողովուրդներին կապող բարեկամության և փոխօգնության բարի ավանդույթները», - նշվում է հաղորդագրության մեջ։