Հանրակրթության վարչության պետի անունից տարածվում է կեղծ հաղորդագրություն. ԿԳՄՍՆ-ն հերքում է տարածել
2 րոպեի ընթերցում
Հայաստանի Հանրապետության կրթության, գիտության, մշակույթի և սպորտի նախարարությունը հերքել է հանրակրթության վարչության պետ Թամարա Սարգսյանի անունից տարածվող հաղորդագրությունները հանրակրթական դպրոցների պաշտոնական էլեկտրոնային հասցեներին։
«Նշված նամակը ապատեղեկատվություն է և որևէ առնչություն չունի նախարարության հետ»,– «Արմենպրես»-ի փոխանցմամբ՝ հայտնում են գերատեսչությունից։
Մեկտեղ, նշում են, որ հետևողական են լինելու յուրաքանչյուր ապատեղեկատվության և մանիպուլյատիվ գործողության բացահայտման հարցում:
«Տեղեկացնում ենք, որ հանրակրթական դպրոցների պաշտոնական էլեկտրոնային հասցեներին ԿԳՄՍ նախարարության հետ առնչություն չունեցող էլեկտրոնային հասցեից տարածվում է կեղծ հաղորդագրություն նախարարության հանրակրթության վարչության պետ Թամարա Սարգսյանի անունից։
ԿԳՄՍ նախարարությունը պաշտոնապես հայտնում է, որ նշված նամակը ապատեղեկատվություն է և որևէ առնչություն չունի նախարարության հետ։
Հանրակրթական ուսումնական հաստատությունների հարգելի՛ տնօրեններ, խնդրում ենք տվյալ նամակը չդիտարկել որպես նախարարության պաշտոնական հաղորդագրություն և առաջնորդվել բացառապես նախարարության պաշտոնական աղբյուրներով ստացվող և պաշտոնական հարթակներում հրապարակվող տեղեկատվությամբ»,– ասված է նախարարության հերքման տեքստում։