Վարչապետ Փաշինյանը Բագրատաշենում ներկա է գտնվել նորակառույց մանկապարտեզի բացմանը

Հայաստանի Հանրապետության վարչապետ Նիկոլ Փաշինյանը Տավուշի մարզ կատարած այցի շրջանակում այցելել է Նոյեմբերյան համայնքի Բագրատաշեն բնակավայր, ներկա գտնվել բնակավայրի նորակառույց մանկապարտեզի բացման արարողությանը:

‹‹Արմենպրես››-ի հաղորդմամբ՝ վարչապետ Փաշինյանն այցի վերաբերյալ համապատասխան տեսանյութ է հրապարակել ‹‹Ֆեյսբուք››-ի իր էջում:

Բացման հանդիսավոր արարողությունից հետո վարչապետը շրջայց է կատարել նորակառույց մանկապարտեզում՝ ծանոթանալով սաների համար նախատեսված պայմաններին: Վարչապետին մանրամասն տեղեկություններ է հաղորդել Քաղաքաշինության կոմիտեի նախագահ Եղիազար Վարդանյանը:

Շրջայցի ընթացքում վարչապետն ուշադրություն է հրավիրել այն հանգամանքի վրա, որ նոր կառուցվող նմանատիպ մանկապարտեզների համար առավել նախընտրելի է ամբողջական փաթեթով նախագիծը:

‹‹Այնտեղ, որտեղ պետք է զրոյից կառուցել, կարծում եմ, այս մանկապարտեզի ձևի վրա պետք է կենտրոնանանք: Սա արդեն փաթեթով պատրաստված կառույց է, որը համալրված է նաև խաղահրապարակով և այլևս որևէ բան չկա այստեղ անելու: Ամեն ինչ փաթեթային է. կառուցում ու փոխանցում ես համայնքին, և վերջինս արդեն անելիք չունի: Մեզ համար էլ է հարմար, քանի որ մենք իմանում ենք, որ աշխատանքն ավարտել ենք և հանձնել համայնքին››,-շեշտել է վարչապետն՝ ընդհանուր առմամբ, գոհունակություն արտահայտելով կառուցված մանկապարտեզի աշխատանքների վերաբերյալ: 

Վարչապետ Փաշինյանը շփումներ է ունեցել նաև տեղի բնակիչների հետ, ծանոթացել բնակավայրում առկա խնդիրներին և պատասխանել նրանց հուզող հարցերին:

Նոյեմբերյան համայնքի Բագրատաշեն բնակավայրի նորակառույց մանկապարտեզը նախատեսված է 140 երեխայի համար և ապահովված է ինչպես խաղահրապարակով, այնպես էլ կանաչ տարածքներով: