Ծանրորդ Գոռ Սահակյանը դարձավ Եվրոպայի առաջնության արծաթե մեդալակիր

Հայաստանի ծանրամարտի տղամարդկանց հավաքականի անդամ, Եվրոպայի առաջնության կրկնակի չեմպիոն Գոռ Սահակյանը դարձավ ընթացիկ ԵԱ-ի փոխչեմպիոն:

«Արմենպրես»-ի հաղորդմամբ` Վրաստանի Բաթումի քաղաքում ընթացող Եվրոպայի առաջնության 71 կգ քաշային ծանրորդների պայքարում Սահակյանը պոկում վարժությունում ունեցավ երկու հաջող մոտեցում` 146 կգ, 150 կգ: Պոկում վարժությունում նա դարձավ ոսկե մեդալակիր:

Հրում վարժությունում նա բարձրացրեց 180 կգ: Այս ձևում նա երրորդն էր: Երկամարտի 330 կգ արդյունքով` Գոռ Սահակյանը Եվրոպայի առաջնության փոխչեմպիոն է:

Ավելի վաղ Հայաստանի հավաքականից ընթացող Եվրոպայի առաջնության արծաթե մեդալակիր էին դարձել Գառնիկ Չոլաքյանն ու Ալեքսանդրա Գրիգորյանը: