«Հայաստան. Թանգարան բաց երկնքի տակ». հունական Էգեյան ավիաուղիների Blue ամսագիրը ծավալուն հոդված է հրապարակել
2 րոպեի ընթերցում
Հունական Էգեյան ավիաուղիների Blue ամսագիրը ծավալուն հոդված է հրապարակել Հայաստանի մասին՝ «Հայաստան. Թանգարան բաց երկնքի տակ» վերնագրով: «Արմենպրես»-ի փոխանցմամբ՝ այս մասին հայտնում է Հունաստանում Հայաստանի դեսպանությունը:
«Հայաստանի Հանրապետությունը շարունակաբար ներկայացվում է որպես հարուստ մշակութային ժառանգություն և ժամանակակից ստեղծարար ներուժ ունեցող երկիր։ Երևանը, որպես մայրաքաղաք, միավորում է պատմական արժեքներն ու նորարարական զարգացումները՝ ձևավորելով բազմաշերտ և գրավիչ միջավայր»,- ասված է հաղորդագրությունում:
Հոդվածում նշվում է, որ Երևանի մշակութային քարտեզում կարևոր տեղ են զբաղեցնում թանգարաններն ու արվեստի կենտրոնները, իսկ երիտասարդական ստեղծարար նախաձեռնությունները, այդ թվում՝ TUMO Studios-ը, նպաստում են նոր սերնդի ներգրավմանը և հայկական ավանդույթների արդիական վերաիմաստավորմանը։
Հայկական խոհանոցը ներկայացվում է ինչպես ավանդական, այնպես էլ ժամանակակից ձևաչափերով։
«Երևանում գործող ռեստորանները համադրում են ազգային համերը նորարար մոտեցումների հետ՝ ապահովելով բարձրակարգ գաստրոնոմիկ փորձառություն։ Միևնույն ժամանակ, Հայաստանը զարգանում է որպես գինեգործական կարևոր ուղղություն՝ հիմնվելով բազմադարյա ավանդույթների և տեղական խաղողի տեսակների վերածննդի վրա»,- նշված է հոդվածում: