Հայաստանի օդանավակայանները 2025 թվականին շուրջ 5.7 միլիոն ուղևորի են սպասարկել

Հայաստանի օդանավակայանների կողմից 2025 թվականի ընթացքում սպասարկվել է շուրջ 5.7 միլիոն ուղևոր, նախորդ տարվա համեմատ աճը կազմել է 7.5 տոկոս։

«Արմենպրես»-ի փոխանցմամբ՝ Ազգային ժողովում ունեցած ելույթի ընթացքում այս մասին հայտնել է ՀՀ տարածքային կառավարման և ենթակառուցվածքների նախարար Դավիթ Խուդաթյանը։  

«Նշված 5.7 միլիոն ուղևորից 1.3 միլիոնը սպասարկվել են հայկական ավիաընկերությունների միջոցներով»,- նշել է նախարարը։

Կառավարության իրականացրած աջակցության ծրագրի շրջանակներում 2025 թվականի հոկտեմբերից ԵՄ խոշորագույն լոուքոստ ավիաընկերություններից մեկը՝ Wizz Air-ը, բազավորվել է Երևանի օդանավակայանում։

Նախորդ տարվա ընթացքում իրականացվել են կանոնավոր չվերթեր 48 ավիաընկերությունների կողմից՝ 67 ուղղություններով։ «Միայն անցած տարվա ընթացքում մեկնարկել են չվերթեր 10 նոր ուղղություններով, այդ թվում Գյումրիի «Շիրակ» օդանավակայանից դեպի Լառնակա։ Իհարկե, պլանավորում ենք չվերթերի աշխարհագրությունն ավելացնել, այդ թվում՝ Գյումրիից»,- ասել է նախարարը։