Իսրայելն ընդունել է մահապատիժ սահմանող օրենք իսրայելցիների սպանության համար դատապարտված պաղեստինցիների համար

Իսրայելի խորհրդարանը ձայների 62-48 հարաբերակցությամբ ընդունել է օրենք, որը մահապատիժ է սահմանում այն պաղեստինցիների նկատմամբ, որոնք դատապարտվել են իսրայելցիների սպանելու համար։ «Արմենպրես»-ի փոխանցմամբ՝ այս մասին հաղորդում է The Associated Press-ը՝ նշելով, որ այս միջոցառումը խստորեն դատապարտվել է միջազգային համայնքի և իրավապաշտպան խմբերի կողմից։

Մեկ տարի շարունակ ծայրահեղ աջերը փորձում էին հասնել այս օրենքի ընդունման, որն ուղղված է իսրայելցիների դեմ ազգայնական հողի վրա կատարված հանցագործությունների համար ավելի խիստ պատիժ սահմանելուն։

Իսրայելի վարչապետ Բենիամին Նեթանյահուն անձամբ է գնացել Քնեսեթ՝ այս օրինագծի շուրջ քվեարկելու։

Ըստ գործակալության՝ մահապատիժը տեղի կունենա կախաղանի միջոցով և կկիրառվի Արևմտյան ափի պաղեստինցիների նկատմամբ, որոնք դատապարտվել են ազգայնական դրդապատճառներով սպանությունների համար։ Օրենքը նաև թույլ է տալիս, որ իսրայելական դատարանները մահապատիժ կիրառեն Իսրայելի քաղաքացիների նկատմամբ, որոնք դատապարտվել են նման մեղադրանքներով։ Ըստ իրավական ոլորտի փորձագետների՝ այս ձևակերպումը նշանակում է, որ մահվան կդատապարտվեին Իսրայելի այն քաղաքացիները, որոնք պաղեստինցի են և ոչ թե հրեա։

Օրենքը նաև չի տարածվի Իսրայելում արդեն իսկ պահվող բանտարկյալների վրա, այդ թվում՝ ՀԱՄԱՍ-ի անդամների, որոնք պատասխանատու են 2023 թ. հոկտեմբերի 7-ին Իսրայելի վրա հարձակման և Գազայի հատվածում պատերազմ հրահրելու համար։

Օրենքն ուժի մեջ կմտնի 30 օրից։