Ընդդիմության առաջարկած քաղաքականությունը 100 տոկոսով կհանգեցնի պատերազմի. ԱԺ փոխնախագահ
2 րոպեի ընթերցում
Ազգային ժողովի նախագահի տեղակալ Ռուբեն Ռուբինյանը հայտարարել է, որ ընդդիմության կողմից առաջարկվող քաղաքականության իրականացումը կհանգեցնի պատերազմի՝ միաժամանակ ընդգծելով, որ ներկայում պատերազմի հավանականությունը գնահատում է զրոյական։
«Արմենպրես»-ի հաղորդմամբ՝ լրագրողների հետ ճեպազրույցում Ռուբինյանը պատասխանեց այն քննադատությանը, թե իշխանությունները ընտրություններից առաջ հասարակությանը սպառնում են պատերազմով։
«Եկեք նախ անալիզի ենթարկենք՝ ինչ է նշանակում սպառնալիք։ Երբ ինչ-որ մեկն ասում է՝ եթե դու չանես սա, ես կանեմ մի բան, որը քո համար վատ կլինի։ Երբ մենք ասում ենք, որ Հայաստանի Հանրապետությունը, եթե որդեգրի այն քաղաքականությունը, որն ընդդիմադիրները առաջարկում են, դա անխուսափելիորեն բերելու է պատերազմի, այստեղ սպառնալիքի որևէ աղերս չկա»,- ասաց նա։
Ռուբինյանի խոսքով՝ ներկայում պատերազմի հավանականությունը հավասար է զրոյի, քանի որ Հայաստանը վարում է այն քաղաքականությունը, որը վարում է։
«Եթե ընդդիմությունը գա իշխանության և սկսի վարել այն քաղաքականությունը, որի մասին հայտարարում է, դա բերելու է ակնհայտ և 100 տոկոսանոց պատերազմի»,- նշեց նա։
ԱԺ փոխնախագահը հիշեցրեց նաև, որ նախկինում իշխանությունների հասցեին հակառակ քննադատությունն էր հնչում՝ պատերազմի ռիսկերը չբարձրաձայնելու համար։
«Այդ նույն մարդիկ ասում էին՝ ինչո՞ւ չեք ներկայացնում իրականությունը, հիմա ասում են՝ ինչո՞ւ եք ասում»,- ընդգծեց Ռուբինյանը։
Նրա խոսքով՝ առաջիկա ընտրությունները ընտրություն են ոչ միայն քաղաքական ուժերի, այլև առաջարկվող քաղաքականությունների միջև։
Ռուբինյանը նշեց, որ «Քաղաքացիական պայմանագիր»-ը հանդես է գալիս գործող խաղաղության պահպանման դիրքորոշմամբ, մինչդեռ ընդդիմադիր ուժերը, ըստ նրա, առաջարկում են վերանայել այդ քաղաքականությունը։
«Եթե վերանայվեն խաղաղության պայմանագրի, վաշինգտոնյան հռչակագրի, TRIPP-ի մասին համաձայնության և սահմանազատման կանոնակարգի կոմպոնենտները, դա բերելու է պատերազմի»,- հայտարարեց նա։