1 րոպեի ընթերցում
Ամստերդամի հրեական դպրոցի մոտ տեղի է ունեցել պայթյուն, որի արդյունքում վնասվել է շենքի արտաքին մասը։ Տուժածներ չկան։ Այդ մասին տեղեկացնում է «Արմենպրես»-ը՝ վկայակոչելով Euronews-ը։
Ամստերդամի քաղաքապետ Ֆեմկե Հալսեման միջադեպը անվանել է ագրեսիայի դրսևորում։
«Ես հասկանում եմ Ամստերդամի հրեական համայնքի վախն ու զայրույթը։ Նրանք ավելի ու ավելի հաճախ են բախվում հակասեմիտիզմի, և սա անընդունելի է», - ասել է Հալսեման։
Նիդեռլանդների վարչապետ Ռոբ Ջեթենը հարձակումը որակել է սարսափելի և ասել, որ Նիդեռլանդներում հակասեմիտիզմի տեղ չպետք է լինի։
Ոստիկանությունը հայտնել է, որ իրենք ունեն տեսախցիկների տեսագրություններ, որոնցում երևում է, թե ով է ենթադրաբար տեղադրել պայթուցիկ սարքը։ Սկսվել է հետաքննություն։
Միևնույն ժամանակ, «Աշաբ ալ-Յամին» ծայրահեղական իսլամական խմբավորումը ստանձնել է հարձակման պատասխանատվությունը՝ հրապարակելով տեսանյութ, որտեղ ենթադրաբար երևում է սարքի պայթեցումը։
Այդ խմբավորման գործունեության հետ են կապվել նաև վերջին օրերին տեղի ունեցած մի քանի այլ հակասեմական հարձակումները, այդ թվում՝ նախորդ օրը Ռոտերդամի սինագոգում տեղի ունեցած պայթյունը։