Նիկոլ Փաշինյանն անձամբ է խնդրել Ցեղասպանության թանգարան–ինստիտուտի տնօրենին աշխատանքից ազատման դիմում գրել․ վարչապետը պարզաբանել է պատճառը
2 րոպեի ընթերցում
Հայաստանի Հանրապետության վարչապետ Նիկոլ Փաշինյանը լրագրողների հետ ճեպազրույցում հարցին ի պատասխան հաստատեց, որ Հայոց ցեղասպանության թանգարան-ինստիտուտի տնօրեն Էդիտա Գզոյանին անձամբ է խնդրել աշխատանքից ազատման դիմում ներկայացնել։
«Արմենպրես»-ի փոխանցմամբ՝ Կառավարության ղեկավարը չհերքեց՝ իր ցուցումի պատճառ է հանդիսացել այն, որ Էդիտա Գզոյանը ԱՄՆ փոխնախագահ Ջեյ Դի Վենսի Հայաստան այցի ընթացքում նրա հետ զրույցում հիշատակել է արցախյան հիմնահարցն ու թեմայի վերաբերյալ գիրք նվիրել։
«Այո՛, ես խնդրել եմ, որ նա հրաժարականի դիմում գրի, օտարերկրյա հյուրին, արցախյան հիմնահարցի թեմայով գիրք նվիրելը ի՞նչ է նշանակում։ Այս երկրում քանի հոգի կարա արտաքին քաղաքականություն վարի։ Հայաստանի Հանրապետությունում արտաքին քաղաքականություն վարում է Հայաստանի Հանրապետության կառավարությունը։ Այն պետական պաշտոնյան, ով Կառավարության վարած արտաքին քաղաքականությանը հակասող բան կասի կամ կանի, պետք է ազատվի աշխատանքից, որովհետև ես դա համարում եմ սադրիչ գործողություն։ Մենք պետություն ե՞նք, թե սա ինքնագործ խմբակ է, որտեղ մեր ստեղծագործական պոտենցիալն ենք փորձարկում։ Սա պետություն է՝ իր կառավարման տրամաբանությամբ և պետական համակարգով, և այդտեղ չքմեղանալու բացարձակ ոչ մի բան չկա»,– նշեց Նիկոլ Փաշինյանը։