Կասեցվել է «Կարաս» հանրային սննդի՝ Երևանում գործող ևս մեկ օբյեկտի արտադրական գործունեությունը

Սննդամթերքի անվտանգության տեսչական մարմնի Երևանի կենտրոնի տեսուչների կողմից «ԱՄՏՋ» ՍՊ ընկերությանը պատկանող «Կարաս» հանրային սննդի օբյեկտում (ք․ Երևան, Գ․ Նժդեհ 34) իրականացված ստուգման ընթացքում պարզվել է, որ խախտվել են սանիտարահիգիենիկ պահանջները:

«Արմենպրես»-ի փոխանցմամբ՝ այս մասին հայտնում են ՍԱՏՄ-ից՝ մանրամասնելով, որ սննդի կառույցի պատերի մի մասը չի ունեցել հարթ մակերես, պատրաստված չի եղել անջրանցիկ, չներծծող նյութերից։ 

Առաստաղների մի մասը կառուցված չի եղել այնպես, որ կանխարգելվի կամ նվազեցվի կեղտի կուտակումը, գոլորշու խտացումը և մասնիկների թափվելու հնարավորությունը։

Սննդամթերքի հետ անմիջական շփման մեջ գտնվող աշխատանքային մակերևույթների մի մասը եղել է ոչ նորոգ վիճակում, չի ախտահանվել և մաքրվել, պատրաստված չի եղել հարթ, մաքրվող, քայքայամաշման (կոռոզիայի) չենթարկվող նյութերից։

Սննդամթերքի անվտանգության տեսչական մարմնի ղեկավարի որոշմամբ՝ «Կարաս» հանրային սննդի օբյեկտի արտադրական գործունեությունը կասեցվել է, հայտնաբերված խախտումները վերացնելու համար սահմանվել է ժամկետ:

Ավելի վաղ ՍԱՏՄ-ից հայտնել էին նաև, որ Երևանում Թումանյան փողոցում գտնվող «Կարաս» հանրային սննդի օբյեկտի արտադրական գործունեությունը կասեցվել է։