ՀՀ-ում Չինաստանի դեսպանի դիտարկմամբ՝ հայ-չինական հարաբերությունները նոր զարգացում են ստացել

Հայ-չինական երկկողմ հարաբերությունների համար անցած տարին նշանակալից է եղել և նոր զարգացում են ստացել տնտեսական, գործնական համագործակցությունը, մշակութային փոխանակումներն ու ժողովուրդների բարեկամությունը։

«Արմենպրես»-ի հաղորդմամբ՝ այս մասին հայտարարեց ՀՀ-ում Չինաստանի դեսպան Լի Սինվեյը չինական Նոր տարվա՝ Գարնանային տոնի առթիվ դեսպանատանը կազմակերպված հանդիսավոր ընդունելությանը։

«ՀՀ վարչապետ Նիկոլ Փաշինյանն այցելեց Չինաստան՝ մասնակցելու Թիենծինում Շանհայի համագործակցության կազմակերպության գագաթաժողովին և սեպտեմբերի 3-ի զորահանդեսին, որտեղ տեղի ունեցավ պատմական հանդիպում նախագահ Սի Ծինփինի հետ։ Երկու առաջնորդները միասին հայտարարեցին ռազմավարական գործընկերության հաստատման մասին, բացելով երկրների հարաբերությունների զարգացման նոր դարաշրջան»,-նշեց դեսպանը՝ հավելելով, որ հայ-չինական համագործակցության շրջանակներում հաջողությամբ առաջ են ընթանում մի շարք նախագծեր, ինչպիսիք են՝ «Հյուսիս–Հարավ» ավտոմայրուղին, արևային էլեկտրակայանները, Հանրային հեռուստատեսության նոր տաղավարը և այլն։  

Դեսպան Լի Սինվեյը կարևորեց նաև Ուրումչի-Երևան ավիաչվերթների հաճախականությունը, որն աճել է մինչև շաբաթական երեք անգամ: Նրա խոսքով՝ Չինաստանից Հայաստան այցելող զբոսաշրջիկների թիվն աճել է 40 տոկոսով։ 

«Հայերի հետաքրքրությունը չինարենի ուսումնասիրության նկատմամբ շարունակում է աճել։ Երկու երկրների ժողովուրդների բարեկամական հարաբերությունները շարունակում են էլ ավելի ամրապնդվել»,-ասաց Հայաստանում Չինաստանի դեսպանը՝ պատրաստակամություն հայտնելով գործընկերների հետ միասին ներդրում ունենալ երկկողմ հարաբերությունների զարգացման, բոլոր ոլորտներում գործնական համագործակցության խթանման և երկու երկրների ժողովուրդների միջև բարեկամության խորացման գործում։ 

Չինական նոր տարվա՝ Գարնանային տոնի առթիվ ՀՀ-ում Չինաստանի դեսպանատանը կազմակերպված հանդիսավոր ընդունելությունն ամփոփվեց տոնական համերգային ծրագրով։