Զինծառայության ժամկետի կրճատումը շրջադարձային փոփոխություն է երրորդ հանրապետության պատմության մեջ․ Պապիկյան

2025 թվականը կարևոր էր պաշտպանության ոլորտի բարեփոխումների տեսանկյունից, և ժամկետային զինծառայության ժամկետի կրճատումը՝ մինչև 1,5 տարի, առանցքային և շրջադարձային փոփոխություններից մեկն է երրորդ հանրապետության պատմության մեջ։

«Արմենպրես»-ի հաղորդմամբ՝ այս մասին մամուլի ասուլիսի ժամանակ հայտարարել է պաշտպանության նախարար Սուրեն Պապիկյանը։

Նախարարը հիշեցրել է, որ 18 ամիս ժամկետային զինծառայության անցնելու որոշումը կայացվել է դեռևս 2021 թվականին և ամրագրվել է ՀՀ կառավարության 2021–2026 թվականների ծրագրում։ Նրա խոսքով՝ այդ նախաձեռնությունը հնարավոր է դարձել պաշտպանության ոլորտում իրականացված բարեփոխումների շնորհիվ։

«Ես առիթ եմ ունեցել խոսելու այն քննադատությունների մասին, որոնք հնչում են 1,5 տարի ժամկետային զինծառայության անցման վերաբերյալ։ Սակայն այս որոշումը մաս է կազմել Կառավարության ծրագրի, և դրա իրականացումը կախված է եղել մեր իրականացրած բարեփոխումների արդյունքներից»,-նշեց Պապիկյանը։  

Նրա խոսքով՝ բարեփոխումների վառ օրինակներից է «Պաշտպան հայրենյաց» ծրագիրը, ինչպես նաև ժամկետային զինծառայության ներգրավվող անձանց թվաքանակի աճը, որը պայմանավորված է զորակոչի որակական և քանակական փոփոխություններով։ Ըստ նախարարի՝ այս գործոններն ամբողջությամբ արձագանքում են թե՛ հանրության, թե՛ մասնագետների հնչեցրած մտահոգություններին։

Պապիկյանը ընդգծեց, որ պաշտպանության նախարարությունը չէր կարող հանդես գալ նման նախաձեռնությամբ առանց Զինված ուժերի գլխավոր շտաբի հետ համաձայնեցման և նրանց կարծիքի։

Հայաստանում 2026 թվականի հունվարի 1-ից զորակոչվողները կծառայեն 1.5 տարի։ Նախորդիվ պարտադիր զինծառայության ժամկետը 2 տարի էր։