Աբրահամ արքեպիսկոպոս Մկրտչյանը, Վազգեն արքեպիսկոպոս Միրզախանյանը և Գևորգ եպիսկոպոս Սարոյանը հեռացվել են Գերագույն հոգևոր խորհրդի կազմից

Հայ Առաքելական եկեղեցու Վայոց Ձորի թեմի առաջնորդ Տեր Աբրահամ արքեպիսկոպոս Մկրտչյանը, Բալթյան երկրների հայոց թեմի առաջնորդ Տեր Վազգեն արքեպիսկոպոս Միրզախանյանը և Մասյացոտն թեմի առաջնորդ Գևորգ եպիսկոպոս Սարոյանը Ամենայն հայոց Գարեգին Բ կաթողիկոսի որոշմամբ հեռացվել են Գերագույն հոգևոր խորհրդի կազմից։ 

«Արմենպրես»-ի փոխանցմամբ՝ լրագրողների հետ զրույցում այդ մասին ասել է Մայր Աթոռի տեղեկատվական կենտրոնի տնօրեն Տեր Եսայի քահանա Արթենյանը։ 

Նրանց փոխարինելու են Սյունիքի թեմի առաջնորդ Տեր Մակար եպիսկոպոս Հակոբյանը, Վիրահայոց թեմի առաջնորդ Տեր Կիրակոս եպիսկոպոս Դավթյանը, Մայր Աթոռ Սուրբ Էջմիածնի «Գարեգին Ա» կրթական կենտրոնի տնօրեն Տեր Վահան եպիսկոպոս Հովհաննիսյանը։ 

Ավելի վաղ Մայր Աթոռի տեղեկատվական համակարգը հաղորդագրություն էր տարածել՝ հայտնելով, որ Ամենայն հայոց կաթողիկոսը գերագույն հոգևոր խորհրդի կազմում անդամների փոփոխություն է արել։ 

Գերագույն հոգևոր խորհրդի կազմից հեռացված Տեր Աբրահամ արքեպիսկոպոս Մկրտչյանը, Տեր Վազգեն արքեպիսկոպոս Միրզախանյանը և Տեր Գևորգ եպիսկոպոս Սարոյանը այն 10 բարձրաստիճան հոգևորականների թվում են, որոնք պահանջում են Ամենայն հայոց կաթողիկոսի հրաժարականը։ Դեկտեմբերի 18-ին բարձրաստիճան 10 հոգևորականները Ամենայն Հայոց կաթողիկոսի հրաժարականի պահանջով նամակը փոխանցել են Մայր Աթոռի քարտուղարությանը։