368.59
Խաղաղությունը չի կարող նշանակել կապիտուլյացիա. Կոշտա
2 րոպեի ընթերցում
Եվրոպական խորհրդի նախագահ Անտոնիու Կոշտան հայտարարել է, որ ԵՄ-ն Ուկրաինայի շուրջ իր խաղաղության ծրագիրն իրականացնում է արդեն երեք տարի՝ ցուցաբերելով տարբեր տեսակի աջակցություն Կիևին և պատժամիջոցներ սահմանելով Ռուսաստանի դեմ։ «Արմենպրես»-ի փոխանցմամբ՝ այս մասին նա ասել է Handelsblatt թերթին տված հարցազրույցում։
Նրա խոսքով՝ Եվրամիության խաղաղության ծրագիրը սկսել է իրականացվել այն ժամանակից ի վեր, երբ Բրյուսելում որոշում ընդունվեց Ուկրաինայի համապարփակ աջակցության՝ դիվանագիտական և տնտեսական, իսկ այնուհետև նաև՝ ռազմական աջակցության մասին։ Կոշտան հավելել է, որ Ռուսաստանի դեմ ԵՄ պատժամիջոցները նույնպես ազդեցություն են թողնում:
«Դա մեր գլխավոր ներդրումն է խաղաղ լուծման հասնելու գործում, քանի որ խաղաղությունը չի կարող նշանակել կապիտուլյացիա», - հայտարարել է Եվրոպական խորհրդի ղեկավարը։
Կոշտան նաև հաստատել է, որ ռուս-ուկրաինական հակամարտության կարգավորման ծրագրի աշխատանքային տարբերակում հանվել են ԵՄ-ին և ՆԱՏՕ-ին վերաբերող բոլոր կետերը։
«Նոյեմբերի 26-ի դրությամբ մենք գիտենք այն, որ Միացյալ Նահանգները և ուկրաինացիները պատրաստել են նոր աշխատանքային փաստաթուղթ։ Նոր ծրագրում ԵՄ-ին վերաբերող բոլոր կետերը հանվել են։ Այն ամենն, ինչ վերաբերում է ՆԱՏՕ-ին, նույնպես հանվել է», - ասել է Կոշտան։
Եվրոպական խորհրդի ղեկավարը նշել է, որ Միացյալ Նահանգներն այժմ պետք է գաղափարները քննարկի Ռուսաստանի հետ:
Բաժանորդագրվեք մեր ալիքին Telegram-ում