Հունաստանում ՀՀ դեսպանն ու ԱԳՆ դիվակադեմիայի տնօրենը քննարկել են երկկողմ գործակցությունը խորացնելու հնարավորությունը
2 րոպեի ընթերցում
Հունաստանում Հայաստանի Հանրապետության արտակարգ և լիազոր դեսպան Տիգրան Մկրտչյանը հանդիպել է Հունաստանի ԱԳՆ դիվանագիտական ակադեմիայի տնօրեն, դեսպան Միխալիս Դիամեսիսին։ «Արմենպրես»-ի փոխանցմամբ՝ այս մասին հայտնում է Հունաստանում ՀՀ դեսպանությունը։
Հանդիպմանը քննարկվել են Հայաստանի դիվանագիտական դպրոցի հետ շփումների հետագա ծավալման հեռանկարները` համաձայն 2017 թ. ստորագրված համագործակցության հուշագրի։ Այդ համատեքստում դեսպան Մկրտչյանն առաջարկել է դիտարկել երկկողմ ուսանողական ճանաչողական այցեր, դասախոսություններ կազմակերպելու հնարավորությունները։ Միաժամանակ ներկայացվել է "Երևանյան երկխոսություն" միջազգային համաժողովը, որը կարճ ժամանակահատվածում վերածվել է միջազգային հիմնախնդիրներին նվիրված կարևոր հարթակի։
Դեսպան Դիամեսիսը ներկայացրել է Հունաստանի դիվանագիտական ակադեմիայի գործունեության ընթացքը և ծրագրերը, կարևորել Հայաստանի հետ փոխգործակցության ակտիվացման անհրաժեշտությունը։
Տիգրան Մկրտչյանը անդրադարձել է Հայաստանի արտաքին քաղաքականության առանցքային հարցերին, մասնավորապես օգոստոսին Վաշինգտոնում ստորագրված փաստաթղթերին, հանուն միջազգային խաղաղության և բարգավաճման Թրամփի ուղուն, Խաղաղության խաչմերուկ նախագծին, տարածաշրջանային այլ հարցերի։ Քննարկվել են նաև Հայաստան-Հունաստան երկկողմ բարձր մակարդակի հարաբերությունները զարգացնելու հնարավորությունները։