Հայաստանի ֆուտբոլի ազգային հավաքականի ավագն այսուհետ կլինի Էդուարդ Սպերցյանը

Հայաստանի ֆուտբոլի ազգային հավաքականի ավագն այսուհետ կլինի «Կրասնոդար»-ի կիսապաշտպան Էդուարդ Սպերցյանը։ 

«Արմենպրես»-ի փոխանցմամբ՝ այս մասին հաղորդագրություն է տարածել Հայաստանի ֆուտբոլի ֆեդերացիան։ 

Վարազդատ Հարոյանի՝ հավաքականում ելույթներն ավարտելու մասին հայտարարությունից հետո գլխավոր մարզիչ Եղիշե Մելիքյանի որոշմամբ՝ Հայաստանի ազգային հավաքականի ավագ էր նշանակվել «Սլովան»-ի հարձակվող Տիգրան Բարսեղյանը։ 

Տիգրան Բարսեղյանն աշխարհի առաջնության որակավորման փուլի շրջանակներում Իռլանդիայի հավաքականի դեմ խաղի ժամանակ մրցակցին գլխով հարվածելու համար կարմիր քարտ էր ստացել ու հեռացվել խաղադաշտից։ Հայաստանի հավաքականն այդ խաղում պարտություն կրեց նվազագույն հաշվով։ 

Տիգրան Բարսեղյանը որակազրկվել է երեք խաղով ու չի մասնակցի հավաքականի առաջիկա խաղերին Հունգարիայի և Պորտուգալիայի հավաքականների դեմ, ինչպես նաև բաց կթողնի հավաքականի ևս մեկ պաշտոնական հանդիպում։