Հայաստանում 2025-ի առաջին կիսամյակում զուտ օտարերկրյա ուղղակի ներդրումների ներհոսքերի աճ է գրանցվել
1 րոպեի ընթերցում
Ընթացիկ տարվա առաջին 6 ամսվա ընթացքում Հայաստանում, հիմնականում հանքարդյունաբերության և ավիացիայի ոլորտներում, զուտ օտարերկրյա ուղղակի ներդրումների ներհոսքերն ավելացել են՝ հասնելով տարեկան ՀՆԱ-ի 0.6 տոկոսին: Դա հաջորդել է 2024 թվականին արձանագրված ՀՆԱ-ի 0.3 տոկոս պատմական ցածր ցուցանիշին։
«Արմենպրես»-ի հաղորդմամբ՝ այս մասին նշված է Հայաստանի տնտեսական զարգացումների վերաբերյալ Համաշխարհային բանկի հրապարակած ամենամսյա ամփոփագրում:
Նշվում է նաև, որ 2025-ի սեպտեմբերին ԱՄՆ դոլարի նկատմամբ ՀՀ դրամի փոխարժեքը մնացել է կայուն՝ օգոստոսի և նախորդ տարվա սեպտեմբերի համեմատ արժևորվելով 1.2 տոկոսով։ Մինչդեռ, եվրոյի և ռուսական ռուբլու համեմատ դրամը տարեկան կտրվածքով արժեզրկվել է համապատասխանաբար 4.4 և 9 տոկոսով:
Օգոստոսին իրական արդյունավետ փոխարժեքը (REER) նախորդ տարվա նույն ամսվա համեմատ արժեզրկվել է 2.2 տոկոսով։ Համախառն պահուստներն աճել են՝ հասնելով 4.2 միլիարդ ԱՄՆ դոլարի, որը համարժեք է ներմուծման 4 ամսվա ծածկույթին։