3 րոպեի ընթերցում
Հայաստանի Պարածանրամարտի հավաքականը մեդալներ է նվաճել աշխարհի առաջնությունում:
«Արմենպրես»-ի մամուլի սրահում լրագրողների հետ հանդիպման ժամանակ այս մասին տեղեկացրին Հայաստանի Պարալիմպիկ կոմիտեի նախագահ Հակոբ Աբրահամյանն ու Հայաստանի ազգային պարալիմպիկ կոմիտեի գլխավոր քարտուղար և ծանրամարտի հավաքականի գլխավոր մարզիչ Գևորգ Հովհաննիսյանը:
Հայաստանի Պարալիմպիկ կոմիտեի նախագահ Հակոբ Աբրահամյանի խոսքով` աշխարհի առաջնությունում գրանցած արդյունքը բացառիկ է թիմի համար:
«Մեր մարզիկները 8 ոսկե, 5 արծաթե, 1 բրոնզե մեդալ են նվաճել աշխարհի այս առաջնությունում` սահմանելով աշխարհի և Եվրոպայի ռեկորդներ: Թիմային հաշվարկում Հայաստանի թիմը 3-րդն է աշխարհի առաջնությունում: Կարծում եմ, սա փայլուն հաջողություն է»,-ասաց Աբրահամյանը:
Պարալիմպիկ կոմիտեի նախագհի խոսքով` ազգային ֆեդերացիաները ֆինանսական աջակցության կարիք ունեն, քանի որ պետության կողմից տրամադրվող աջակցությունները քիչ են ու չեն բավարարում: Եթե համապատասխան ֆինանսավորում լինի, մեծ կլինի նաև ներհոսքը:
Հայաստանի ազգային պարալիմպիկ կոմիտեի գլխավոր քարտուղար և ծանրամարտի հավաքականի գլխավոր մարզիչ Գևորգ Հովհաննիսյանն աշխարհի առաջնության արդյունքները համարում է հաջող:
«Աշխարհի առաջնությանը մասնակցում են երկու տարիքային խմբի մասնակիցներ` 15-17 տարեկաններ ու 18-20 տարեկաններ: Պատանի մարզիկներից Ռաֆայել Համազասպյանը դարձավ աշխարհի և Եվրոպայի ռեկորդակիր: Այս տարիքային խմբում Կարինե Մանուկյանը ևս ռեկորդներ սահմանեց: Այստեղ նաև հաջող հանդես եկավ Գավառից Արտյոմ Մովսիսյանը, ով երկու ոսկե մեդալ նվաճեց: 59 կգ քաշային կարգում երկու հայազգի մասնակից ունեինք` Արթուր Բաբայանն ու Խորեն Ծատուրյանը: Նրանք երկուսն էլ սահմանեցին ռեկորդ ու հաջորդաբար դարձան ոսկե ու արծաթե մեդալակիր: Առաջին անգամ մասնակցող Տիգրան Խլղաթյանն ու Դավիթ Հունանյանը ևս դարձան առաջնության մեդալակիրներ: Ոսկե մեդալակիր դարձավ նաև Անյուտա Պետրոսյանը»,-ասաց Հովհաննիսյանը:
Վերջինիս խոսքով` հայ մարզիկների համար կարևոր էր աշխարհի այս առաջնության մասնակցությունը, քանի որ Լոս Անջելեսի Օլիմպիական խաղերի համար անհրաժեշտ են ԱԱ-ի մասնակցություն:
Մանրամասները` տեսանյութում