Սահմանադրության նորմերը սկսել են գործել թավշյա հեղափոխությունից հետո. ՀՀ նախագահը հարցազրույց է տվել «Khaleej Times»-ին
2 րոպեի ընթերցում
Հայաստանի Հանրապետության նախագահ Վահագն Խաչատուրյանը հարցազրույց է տվել Արաբական Միացյալ Էմիրություններում լույս տեսնող «Khaleej Times» ամսագրին:
«Արմենպրես»-ի փոխանցմամբ՝ նախագահն անդրադարձել է 2018 թվականի հեղափոխությունից հետո Հայաստանում իրականացվող բարեփոխումներին, նշել, որ դրանք ամրապնդել են օրենքի գերակայությունը, կանխարգելել կոռուպցիան և հավասար պայմաններ ստեղծել ներդրողների համար:
«2018 թվականից հետո Սահմանադրությամբ ամրագրված նորմերը սկսել են գործել։ Խոսքը ժողովրդավարության մասին է. մարդկանց՝ իշխանության ղեկին գտնվելու հնարավորություն տալը, տնտեսության մեջ հավասար մրցակցություն ապահովելը, օրենքի գերակայության պահպանումը և կոռուպցիայի դեմ պայքարը»,- նշել է նախագահը:
Հարցազրույցում արձանագրվել է, որ Արաբական Միացյալ Էմիրություններն այս տարի դարձել է Հայաստանի խոշորագույն օտարերկրյա ուղղակի ներդրողը և մեծությամբ երկրորդ առևտրային գործընկերը:
«Հայաստանը ոգեշնչվում է Էմիրությունների պատմությունից։ ԱՄԷ-ի օրինակը և պատմությունը լավ դաս է սերտելու համար․Համերաշխություն, ներդաշնակություն, երազանքներ, ծրագրեր և դրանց իրականացում»,- ընդգծել է Վահագն Խաչատուրյանը:
Հայաստանի նախագահ Վահագն Խաչատուրյանը բարձր է գնահատել Հայաստան-Արաբական Միացյալ Էմիրություններ երկկողմ հարաբերությունները և անդրադարձել փոխադարձ հետաքրքրության ոլորտներին:
«Շնորհակալություն եմ հայտնում ԱՄԷ իշխանություններին՝ հայ համայնքի կայացման և զարգացման բարենպաստ պայմաններ ստեղծելու համար»,- նշել է Խաչատուրյանը:
«Khaleej Times»-ի համարում հրապարակվել են նաև ՀՀ էկոնոմիկայի նախարար Գևորգ Պապոյանի, Տարածքային կառավարման և ենթակառուցվածքների նախարար Դավիթ Խուդաթյանի, Ֆինանսների նախարար Վահե Հովհաննիսյանի և Կենտրոնական բանկի նախագահ Մարտին Գալստյանի հարցազրույցները: