Հայաստանում 2024 թվականի ընթացքում պահպանվել է բարձր տնտեսական ակտիվություն. Մարտին Գալստյան
2 րոպեի ընթերցում
Հայաստանում 2024 թվականի ընթացքում պահպանվել է բարձր տնտեսական ակտիվություն՝ պայմանավորված գերազանցապես ծառայությունների, շինարարության և առևտրի ոլորտներում արձանագրված բարձր աճերով։
«Արմենպրես»-ի փոխանցմամբ՝ այս մասին Ազգային ժողովում ՀՀ կենտրոնական բանկի 2025 թվականի գործունեության վերաբերյալ տարեկան հաղորդման ներկայացման ժամանակ ասաց ՀՀ կենտրոնական բանկի նախագահ Մարտին Գալստյանը։
«Այդուհանդերձ, երկրորդ կիսամյակից դիտվել է տնտեսական ակտիվության որոշակի դանդաղում, և տնտեսական աճը մոտեցել է գնահատվող երկարաժամկետ կայուն մակարդակին՝ 2024 թվականի համար կազմելով 5.9 տոկոս։
Հաշվետու ժամանակահատվածում համախառն պահանջարկը ճշգրտվել է, ևս մոտեցել իր կայուն մակարդակին։ Պահանջարկի կառուցվածքում դիտվել է արտաքին պահանջարկի աճի տեմպի աստիճանական դանդաղում՝ կապված առավելապես զբոսաշրջության հոսքի նվազման հետ։ Փոխարենը զգալիորեն աշխուժացել է ներքին պահանջարկը՝ պայմանավորված մասնավոր սպառման բարձր աճով, որին նպաստել են եկամուտների շարունակական ավելացումն ու նախկինում կուտակված խնայողությունների ծախսումը»,- ասաց Գալստյանը։
Նա հավելեց, որ պահանջարկի աստիճանական դանդաղումն ու աշխատուժի առաջարկի ավելացումը որոշակիորեն մեղմել են աշխատաշուկայի պայմանները։ ԿԲ նախագահի խոսքով՝ այս ամենն արտահայտվել է աշխատավարձերի, կոշտ գներով բնութագրվող ծառայությունների գնաճի և գնաճային սպասումների կայունացմամբ։
«Գնաճային նման զարգացումների ներքո 2024 թվականին մենք շարունակել ենք աստիճանաբար նվազեցնել քաղաքականության տոկոսադրույքը՝ ընդհանուր առմամբ 2.25 տոկոսային կետով և դեկտեմբերին այն կազմել է 7 տոկոս։ Ընդ որում, նախապատվությունը մշտապես տրվել է դրամավարկային պայմանների աստիճանական թուլացմանը»,- ընդգծեց ՀՀ ԿԲ նախագահը։
Մարտին Գալստյանը հայտնեց, որ 2024 թվականի վերջին 12-ամսյա գնաճը կազմել է 1.5 տոկոս, իսկ 12-ամսյա բնականոն գնաճը՝ 0.9 տոկոս։