1 րոպեի ընթերցում
Ղազախստանի նախագահ Կասիմ-Ժոմարտ Տոկաևը առաջարկել է երկրում իրականացնել խորհրդարանական բարեփոխումներ և ստեղծել միապալատ խորհրդարան՝ ներկայիս երկպալատ խորհրդարանի փոխարեն։ Ինչպես հաղորդում է «Արմենպրես»-ը՝ վկայակոչելով Kazinform-ը, այս մասին նախագահը հայտարարել է Ղազախստանի ժողովրդին ուղղված իր ուղերձում։
Տոկաևը նշել է, որ հարցը լուրջ է, ուստի կարիք չկա այս հարցում հապշտապ որոշումներ կայացնել ու անհրաժեշտ է այն լայն քննարկման դնել՝ հատկապես քաղաքացիական հասարակության ներսում։
Ղազախստանի նախագահի կարծիքով՝ հարցի քննարկումը առնվազն մեկ տարի կարող է տևել։ «Դրանից հետո 2027 թվականին կարելի է համազգային հանրաքվե իրականացնել, իսկ հետո անհրաժեշտ փոփոխությունները մտցնել Սահմանադրության մեջ։ Ես բազմիցս եմ ասել, որ պետության համար ճակատագրական բոլոր հարցերը պետք է որոշվեն ժողովրդի համաձայնությամբ»,- նշել է նա։
Տոկաևը հայտնել է նաև, որ երկրում կստեղծվի արհեստական բանականության հարցերով նախարարություն, որը գլխավորելու է փոխվարչապետը։ Ղազապստանի նախագահի խոսքով՝ տնտեսության բոլոր ճյուղերի մոդեռնիզացիայի համար հարկավոր է արհեստական բանականության զանգվածային ներդրում։