Երգիչ Սարո Գևորգյանը մասնակցում է Ղազախստանում անցկացվող Silk Way Star միջազգային հեռուստատեսային նախագծին
2 րոպեի ընթերցում
Ղազախստանի մայրաքաղաք Աստանայում պաշտոնապես մեկնարկած Silk Way Star միջազգային հեռուստատեսային նախագծին Հայաստանից այս տարի մասնակցում է երգիչ Սարո Գևորգյանը: «Արմենպրես»-ի հաղորդմամբ՝ այս մասին հայտնում են Ղազախստանի Հանրապետության նախագահի հեռուստառադիո համալիրի մամուլի ծառայությունից:
Շոուն իրականացվում է Ղազախստանի Հանրապետության նախագահի հեռուստառադիո համալիրի և Չինաստանի CMG մեդիա կորպորացիայի միջև՝ Silk Way Star միջազգային նախագծի ստեղծման մասին համաձայնագրի շրջանակներում։
Սա առաջին համատեղ երաժշտական նախագիծն է, որին մասնակցում են կատարողներ Հայաստանից, Ուզբեկստանից, Ադրբեջանից, Վրաստանից, Ղազախստանից, Չինաստանից, Ղրղզստանից, Մոնղոլիայից, Տաջիկստանից, Թուրքմենստանից և Հարավային Կորեայից:
Նախագիծը միտված է տարբեր երկրների միջև մշակութային փոխանակման զարգացմանը, ժողովուրդների միջև բարեկամության ամրապնդմանը և միջազգային ասպարեզում ազգային արվեստի ներկայացմանը: Միջոցառման ծրագրով նախատեսված են մրցութային ելույթներ, շոու և գալա համերգ:
«Այս տարի Հայաստանը ներկայացնելու պատվին արժանացել է տաղանդավոր երգիչ Սարո Գևորգյանը: Վստահ ենք, որ նրա մասնակցությունն իրապես արտացոլում է Հայաստանի մշակութային հարուստ ժառանգությունը»,- նշված է կազմակերպիչների տարածած հաղորդագրությունում: