«Գիտելիքի ծառի զարթոնքը». կրթական-մշակութային միջոցառում՝ Երևանի Նելսոն Ստեփանյանի անվան 71 հիմնական դպրոցում
2 րոպեի ընթերցում
Գիտելիքի և դպրության օրը՝ սեպտեմբերի 1-ը, ոչ միայն նոր ուսումնական տարվա մեկնարկի խորհրդանիշն է, այլև կրթության ու մշակույթի վերարժևորման նշանակալի իրողություն է։ Տոնի առթիվ Երևանի` Նելսոն Ստեփանյանի անվան հ․ 71 հիմնական դպրոցում կազմակերպվել էր տոնական միջոցառում` «Գիտելիքի ծառի զարթոնքը» խորագրով։ Միջոցառման բովանդակային առանցքը պայմանավորված էր խորհրդանշական կերպարներով, որոնք իրենց պատգամներով դիմեցին սովորողներին՝ ընդգծելով գիտելիքի, բարոյականության և ստեղծարարության կարևորությունը ժամանակակից կրթական գործընթացներում։
«Արմենպրես»-ի հաղորդմամբ՝ սովորողների մասնակցությամբ ներկայացված գունեղ հերոսները հանդես եկան ոչ միայն մանկավարժական, այլև մշակութաբանական ընդգծումներով՝ խրախուսելով ուսումնատենչությունը և համախմբվածությունը։ Օրն էլ ավելի տոնական դարձավ ազգային երգ ու պարի ներկայացումներով, որոնք միջոցառմանը հաղորդեցին ազգային ինքնության պահպանման և փոխանցման առանձնահատուկ շեշտադրում։
«Այս համադրությունը վկայակոչումն է նրա, որ դպրոցական կրթությունը շարունակում է իրականացնել ոչ միայն գիտելիքի, այլև ազգային-մշակութային արժեքների փոխանցման կարևոր առաքելությունը»,-բացելով միջոցառումն ու ողջունելով սաներին՝ նշեց դպրոցի տնօրեն Արմենուհի Սեյրանյանը:
Այսպիսով՝ «Գիտելիքի ծառի զարթոնքը» միջոցառումը դարձավ կրթական միջավայրի վերաիմաստավորման և նոր ուսումնական տարվա ոգեշնչող մեկնարկի խորհրդանշական արտահայտությունը՝ ամրապնդելով դպրոցի դերը հասարակության մշակութային և կրթական կյանքում։
Միջոցառմանը ներկա է եղել ՀՀ վարչապետի աշխատակազմի Ազգային փոքրամասնությունների կրթամշակութային կենտրոնի ղեկավար Ավագ Հակոբյանը: