2 րոպեի ընթերցում
Կորեայի Հանրապետության նախագահ Լի Չժե Մյոնը և Ճապոնիայի վարչապետ Շիգերու Իշիբան կողմ են արտահայտվել երկկողմ կապերի և համագործակցության ամրապնդմանն իրենց ընդհանուր դաշնակից Միացյալ Նահանգների հետ։
«Արմենպրես»-ի հաղորդմամբ՝ այս մասին հայտնում է ՏԱՍՍ-ը՝ մեջբերելով երկու երկրների ղեկավարների հայտարարությունները։
Ղեկավարները Ճապոնիայի կառավարության ղեկավարի նստավայրում՝ Տոկիոյում, երկկողմ բանակցություններից հետո նշել են, որ աշխարհում ստեղծված բարդ իրավիճակի համատեքստում Սեուլի և Տոկիոյի հարաբերությունների կայուն զարգացումը համապատասխանում է երկու երկրների շահերին և օգուտ է բերում ամբողջ տարածաշրջանին։
«Այս պայմաններում Ճապոնիայի, Կորեայի Հանրապետության և Միացյալ Նահանգների միջև համագործակցության ամրապնդումը չափազանց կարևոր է»,-ասել է Ճապոնիայի վարչապետը։
Վերջինս նաև հանդես է եկել Տոկիոյի և Սեուլի միջև ռազմավարական երկխոսության և ԿԺԴՀ-ի (խմբ․՝ Հյուսիսային Կորեա) «լիակատար ապամիջուկայնացման» օգտին։
Կորեայի Հանրապետության նախագահն էլ, իր հերթին, նույնպես ընդգծել է «Կորեական թերակղզու լիակատար ապամիջուկայնացման, երկու երկրների միջև անսասան հարաբերությունների ամրապնդման և Միացյալ Նահանգների հետ համագործակցության» կարևորությունը։
Լի Չժե Մյոնը նշել է, որ Սեուլը և Տոկիոն մտադիր են վերսկսել այցելությունների կանոնավոր փոխանակումները ամենաբարձր մակարդակով։ Նա ընդգծել է, որ կողմերը համաձայնել են համագործակցել ընդհանուր սոցիալական խնդիրների, այդ թվում՝ ծերացող բնակչության և ցածր ծնելիության խնդիրների լուծման գործում։
Նշվում է, որ Հարավային Կորեայի նախագահը պաշտոնը ստանձնելուց հետո իր առաջին պաշտոնական այցը կատարում է հենց Տոկիո, ինչը համընկնում է երկու երկրների միջև դիվանագիտական հարաբերությունների հաստատման 60-ամյակի հետ։
Հաղորդվում է, որ Տոկիոյից հետո Լի Չժե Մյոնը կմեկնի Միացյալ Նահանգներ, որտեղ բանակցություններ կվարի նախագահ Դոնալդ Թրամփի հետ։