1 րոպեի ընթերցում
Բաթումի քաղաքային դատարանը վրացական «Բաթումելի» և «Նետգազետի» ինտերնետ հրատարակությունների հիմնադիր Մզիա Ամագլոբելիին երկու տարվա ազատազրկման է դատապարտել 2025 թ. հունվարին Աջարիայի մայրաքաղաքում կայացած հանրահավաքի ժամանակ Բաթումի ոստիկանապետ Իրակլի Դգեբուաձեին ապտակելու համար։ «Արմենպրես»-ի փոխանցմամբ՝ այս մասին հաղորդում է «Ինտերֆաքս» գործակալությունը:
Ամագլոբելիի կալանավորումը լայն արձագանք է առաջացրել, այդ թվում՝ Եվրոպայում։ Եվրախորհրդարանի պատգամավորներն իրենց բանաձևերում կոչ են արել Վրաստանի կառավարությանը անհապաղ ազատ արձակել լրագրողին։ Դատախազության կողմից առաջարկություններ են եղել ձևակերպել դատավարական համաձայնագիր, որի համաձայն Ամագլոբելին կընդուներ իր մեղքը և կազատվեր նախնական կալանքից, սակայն դա տեղի չի ունեցել։
Վրացական ընդդիմության ներկայացուցիչներն Ամագլոբելիին համարում են գործող իշխանությունների դեմ պայքարի խորհրդանիշ։
Իրենց հերթին վրացական իշխանությունների ներկայացուցիչները հայտարարում են, որ ոստիկանի վրա ցանկացած հարձակում պետք է խստորեն պատժվի օրենքի շրջանակներում։
Այժմ Բաթումում ընդդիմության կողմնակիցները ցույց են անցկացնում՝ պահանջելով ազատ արձակել Ամագլոբելիին։